Xebatkar û kedkaranê JIYAN TV bi aşkerekerdişeke pîyayî padayişê qenalî ra nêrazîbîyen damûsnay. Aşkerekerdiş de padayişê qenalî zey zilm, bêbextîye, bêhiqûqîye û bêqanûnîye ame biname kerdiş. Kedkaranê JIYAN TV day zonayen ke iyê dê bi kirmanckî, bi kulturê kirmancîye, bi vengê merdimahîye, bi rengê azadî xo ver o bide û slogana xo ya ‘Xo bê ziwan, ziwanê xo zî bêwayîr meverde!’ zey vengdayişî ardî zon. Aşkerekerdişa pîyayî yê Xebatkar û kedkaranê JIYAN TV nîya ya:
“Kirmanckî rîwalê polîtîkayanê asîmîlasyonî, her ke şino beno kêmî. Ma seba ke wayîrê ziwanê xo vejîme kewtîme rayîr. JIYAN TV seba şarê kirmancî hem mekteb, hem keye, hem kitab, hem qeleme, hem şahîye, hem şînahîye, hem azadîye, hem vengê hezaran serran ê verênan, hem zî veng û rengê domananê demê verê ma bî. No zulm o, na bêbextîya, na bêhiqûqîye, na bêqanûnîye ya.
Bê ziwan şar bê şarî zî ziwan nêbeno
Her vaş koka xo ser o royîno. Her teyr bi ziwanê xo waneno. Her şar bi reng û rengê xo esto. Heqa her şarî esta ke bi ziwanê xo biwano, bi nuşno û goşdarîye bikero. Bê ziwan şar, bê şarî zî ziwan nêbeno. Ma bi kirmanckî, ma bi kulturê kirmancîye, ma bi vengê merdimahîye, ma bi rengê azadî, ma bi heqê însanetî, ma bi hêza tarîxê nê erdî dest bi weşanê xo kerdibî û ma do bi kirmanckî, bi kulturê kirmancîye, bi vengê merdimahîye, bi rengê azadî, bi heqê însanetî, bi hêza tarîxê nê erdî xo ver o bide. Ma xebatkar û kedkare JIYAN TV vanime ke, ‘Xo bê ziwan, ziwanê xo zî bêwayîr meverde. MA ŞIMA YÊ, ŞIMA ZÎ MA!’“
NAVENDÊ XEBERAN