Xo wela xo ra newe ra rona

Serra 1895 de qezaya Sûrî ya Amedî de Bazarê Simerî, Qazanvanan, Kurkroşan, Saraçvanan û Cadeyê Melek Ahmetî de şewat vejîyeno û no şewat 3 rojan dewam keno. Şewatî ver Sûka Derge de heme dikanî veşenî, benî wel. Cok ra na sûke ra vajîyeno Şarşîya Şewitî. Goreyê tayînan seba ke na sûke de xeyrî-muslîmî estî û zaf dewlemend bîyî, no şewat seba vernîgirewtişê dewlemendîya înan bi zanayîş ameyo vetiş. Serra 1914 de na sûke de reyna şewat vejîyeno û reyna sûke bena wele. Na sûke newe ra yena awankerdiş 

Tesîrê krîzî 

Sûka ke bi renginîya xo bîya sembolê Amedî, nê rojan de bêvengîyêka girde tîya de hakim a. Kanûna 2015 ra nata bin nameyê qedexeyê tebervejîyayîşê kuçeyan de rijnayîşêko gird ame kerdiş û kûlubêyê polîsan qeza açarnayo hepisxaneyêko akerde. Cok ra sûka ke verê cû merkezê bazarî bîye, nika ti kes nêşono na sûke. Zafaneyê sûke de esnafan dikananê xo padayo. Sûke de esnafî çîyê ke rotêne û nameyê dikananê xo yê bi kurdî ver, tim raştê zext û tedayan ameyênê. Esnafî vanî ke seba krîz ra vejîyayîşî tena rayîrêk esto, o zî agêrayîşê masaya muzakere yo.