28ê Îlone de  JIYAN TV û Zarok TV zî tede, 12 qenalê televîzyonî û 11 qenalê radyo bi Qerarê Hukmê Qanûnî (KHK) hetê Serekwezîrîye ra ameyî padayîş. Dûştê na qerarî hêr û reaksîyonê gurekaranê çapemenîya azad û temaşekerdoxanê ci benê hera. Jû qenala ke amê giroten zî JIYAN TV ya ke qenala ewilîn ke bi kirmanckî weşan kena ya. JIYAN TV 21ê Adara emserr de bi sloganê “xo bê ziwan, ziwanê xo zî bêkes meverde“ destpa weşan kerd. Midurê Weşana Pêroyî yê JIYAN TV Emrah Kelekçîer ke derheqê sansur û êrişanê ser çapemenî de qisey kerd nêrazîbîyen damûsna.  Kelekçîerî vist vîrî ke emelê esasî yê girotişê qenalanê mûxalîf zey viraştişê  medyayeke hetkar û îteatkar hesibna û va, "Her yewê nê qenalan xîtabê leteyekê ciya yê civakê kerd û wayîrê girseyekê temaşekaran bî.”

Leteyekê polîtîkayanê asîmîlasyonî yo

Emrah Kelekçîerî hayr ant JIYAN TV ser û vist vîrî ke JIYAN TV tenya jû qenalake ke bi kirmanckî weşan kena bî û bi nê vatenan behsê weşana qenalanê bîn yê ke amey giroten kerd: “Zarok TV  bi xêlê lehçeyanê kurdkî fîlmê karton seba domanan (qeçekan) weşîna. TV 10 ser kultur û îtiqatê Elewîyan weşan kerd. Hayatin Sesî V vengê emegdar û gurekaran o. Wexto ke merdim no çarçove de penase bikero na raştî vejyena werte; Girotişê qenalanê mûxalîf hewldaneke rêzê ya birnayişê vengê mûxalîf nîyo. Na raştî yew leteyekê muhîm yê polîtîkayanê asîmîlasyon û çinî kerdişî yo, ke bi se serrîyo yeno ramiten.”

Kirmanckî lehçeyekê dewlemend o
Kelekçîerî da zonayen, ke zey JIYAN TV înan hewl da ke lehçeyê kirmanckî  ke ver merdişî de yo bikerê leteyekê cuye û wina dewam kerd: “Weşaneke dûr û derg ê JIYAN TV çîna. 21ê Adara 2016î de destpa weşana bi lehçeyê kirmanckî kerd û zerreyê 6 aşman de se ra 90î ra vêşêr weşana xo bi kirmanckî bi.  Wextekê kilm de xo resna girseyekê hera yê temaşekaran. Seba ma kişta muhîm ê weşanî na bî ke, damûsna ke kirmanckî heşkena qadanê ciwîyayişî de bîro şixûlnayen. Vêşêr ra 20 bername û xeberan îspat kerd ke kirmanckî lehçeyekê dewlemend o ke tenya keye de nê, qadanê ekonomî, kultur û xêlê qadanê weşî de bîro şixulnayen.”

Qerar MGK de ame giroten
Midurê Weşana Pêroyî yê JIYAN TV Emrah Kelekçîerî hayr ant wextê girotişê qenalan ser û na jûyî manîdar dî. Kelekçîerî vist vîrî ke Tirkîye de qerarê muhîm badê kombîyayişê Desteya Tîvarîya Milî de yenê aşkerekerdiş û zey nimûne zî qerarê herb ke badê kombîyayişa MGK ya serra 2014î damûsnayen. Emrah Kelekçîerî aşkere kerd ke cayê zey  Sûr, Nisêbîn, Cizîr û Gever çarçoveyê no qerarî de amey talan û wêran kerden û wina dewam kerd: “Qeraro ke kombîyayişê MGK yê 28ê  Îlone de  de vejya zî

girotişê çapemenîya mûxalîf bi. Goreyê tecrûbeyanê xo ma êşkenê vajê; polîtîkayê ke emserr esas bîrê giroten dê polîtîkayanê serranê 2014 û 2015î ra hona vêşêr giran bê. Çike bêvengkerdişê çapemeniya Kurdistan yena maneya xorînkerdişê herb o.” Kelekçîerî aşkere kerd ke cok ra seba seveknayişê heqanê şarî û seba wayîrvejyayişê gelenega çapemeniya azad, iyê dê çarçoveyê hiqûq de heta peynî tekoşîn bikerê.


ELÎF DOGAN/MELEK YUKSEL
ANF/AMED