Hewlêr de 17ê Temmuze de vera endamanê îstîxbaratê Tirkan de çalakîyêk ameybî viraştene û netîceyê çalakîye de 3 kesî merdbî. Hêriş ra dima heme rayîrî ameybî padayene, labelê dima ra rayîrê Hewlêr û Mexmûrî qet nêame akerdene û Kampa Mexmûrî ser o ambargo ameye ronayene.
71 rojî yo ke ambargo dewam kena û seba wedaritişê ambargo heta nika çalakîyê tewir bi tewirî ameyî viraştene. Qeymeqamê Mexmûrî Serekkomarîya Îraqî rê mektûbe erşawite û xeylê dezgehan de pêvînayîşî kerdî. Reyna komîteyêk ame ronayene û Komîte Parlamentoyê Îraqî ra waşt ke wa heyetêk bierşawo Mexmûr. Na çarçewa de herêma Katalonya ra heyetêk şi Kampa Mexmûrî zîyaret kerd.
Ambargo ver nêweşî nêşênî şêrî nêweşxaneyanê Hewlêrî û Mexmûr de problemê darûyan dewam keno. Nêweşan ra Fatma Kara û Zeynep Ehmede seba ke nêşêna şêrî nêweşxane, bebekê xo vînî kerdî. Heta nika xeylê kesan nêşêna şêro kar, cok ra bêkar mendî. Dayîkanê Aştîye yê Mexmûrî 1ê Êlule de waşt Asayîşê Hewlêrî reyde pêvînayîş bikerî. Labelê destûr nêame girewtene. Dayîkî nuqtaya asayîşî de 26 rojî yo ke çalakîya roniştişî virazenî. Dayîkî dîyar kenî çalakîya înan do heta peynîye dewam bikero. Hêzê Asayîşê destûr nêdano ke ti kes şêro zîyaretê dayîkan.
ROJNEWS / MEXMÛR