Endamê Komîteya Merkezî yê PKKyî Cemal Şerikî derheqê muhîmîya awankerdişê yewîya hêzê demokratan û referandûmo ke do 16ê Nîsane de bêro kerdiş de qisey kerd û vînayîşê xo ard ziwan.
Endamê Komîteya Merkezî yê PKKyî Şerikî destpêka qiseykerdişê xo de serrgêra 45. ya Kizildere ke Mahîr Çayan û 9 embazê ke hetê ci de Kizildere de şehîd kewtbî, yad kerd û wina domna: “Xoverdayîşê Kizildere vera îqtîdarêko faşîst û dagîrker de bî û no het de xoverdayîşê Kizildere manîfestoyêk o. Mahîr û embazanê ey seba ke Denîzan bixelisnî çalakîyêka winasî viraştî.”
Şerîkî dewamê qiseykerdişê xo de qala vejîyayîşê Rayberê Şarê Kurdî Abdullah Ocalanî kerd û wina dewam kerd: “Rayber Apoyî waşt nê mîrasî bi zemînêko sîyasal û demokratîk de awan bikero û HDP û HDK zî netîceyê gêrayîşê Rayber Apoyî de vejîyayî orte. Xora Rayber Apoyî kongreya awankerdişî yê HDPyî de mesajêk erşawitbî û vatbî ‘No eynî wextî de awankerdişê bêrîkerdişê Mahîr Çayanî yo’. Cok ra Tevgerê Şorişo Yewbîyaye yê Şaran (HBDH) sey parçeyêk nê gêrayîşan manayêk girewt.”
Cewabo tewr baş o
Şerikî dewamê qiseykerdişê xo de va ‘Kizildere nîşan da ke ancax vera faşîzmî de bi xoverdayîş eşkîyeno bêro qezençkerdiş’ û wina dewam kerd: “Kizildere seba awanbîyayîşê yewîya şorişger û demokratan, vengdayîşêk bî. No vengdayîş rê ewro hetê şorişgeranê Kurdistan û Tirkîya ra wayîr ame vejîyayîş. Prosesêko winasî de muhîmîya referandûmo ke 16ê Nîsane de bêro viraştiş esta. Çimkî faşîzmê AKP û MHPyî wazeno xo mende bikero. Cok ra seba vernîgirewtişê faşîzmî rolêko gird yê referandûmî esto. Ganî hêzê demokrasî û şorişgerî seba nê hêrişan amadekarîyê xo bikerî. Eke hêzê demokrasî û şorişgerî amadekarîyê xo bikerî, do qezenç bikerî. No zî do seba yadkerdişê Mahîran cewabêko tewr baş o.”
BAZ SÎPAN / ANF / BEHDÎNAN