Fermandarê Qerargehê Merkezî yê Pawitişê Şarî Mûrat Karayilanî derheqê hêrişê dagîrkerîye yê artêşa Tirkî û xoverdayîşo ke vera ci de yeno nîşandayene de Radyoyê Dengê Welatî rê qisey kerd. Karayilanî dîyar kerd ke ganî herkes vera nê hêrişanê AKP û MHPyî de bivindero û dîyar kerd ke şarî do qezenç bikerî û ameyoxê xo dîyar bikerî.
Karayilanî veng da heme hêzanê gerîlayan ke wa nê prosesî baş biwanî û cewabêko hewce keno bidî dişmenî. Karayilanî va ‘ganî ciwanî heme vera xo bidî koyan û hem zî bajaran bikerî wareyanê serewedaritişan’ û wina domna: “Wa herkes bizano ke wayîrvejîyayîşê Şerê Xoverdayîşê Rojawanî wezîfeyê ma yê neteweyî, ehlaqî, wijdanî û merdimîye yo. Wa ciwanî tena temaşe nêkerî, rolê xo zî kay bikerî. Ma zanî ke zext û tedayê polîsan zaf î, labelê wa herkes bizano ke kardî resaya esteyî. Coka ganî şar astengîyan derbaz bikero û bikewo têgêrayîşî mîyan.”
Karayilanî da zanayene ke no şer tena yê Vakur û Rojhelatê Sûrîye nîyo û wina va: “No şerê pawitişê estena şaran o û vera faşîzmê AKP û MHPyî, çeteyanê DAÎŞ û El Nusra de yeno dayene. Wa şarê ma nêterso û cayê xo de bimano. No zaf muhîm û stratejîk o. Dişmen wazeno ke şarê ma bido koçkerdene û ewja veng bikero. Ganî herkes goreyê nêyî hereket bikero.”
Seba ke DAÎŞî çinbîyayîş ra bixelisnî hêriş kenî
Karayilanî qiseykerdişê xo de hêzanê koalîsyonî ser o vindet û wina va: “Eke hêzê koalîsyonî raşta zî vera hêrişan de yî, o wext wa wareyê hewayî yê Sûrîye dewleta Tirkî rê padî. Eşkenî wina bikerî, çimkî kontrolê înan de yo. Eke wina nêkerî o wext demek samîmî nîyî, dirî yî. Ê seba ke DAÎŞî çinbîyayîş ra bixelisnî hêriş kenî. Coka nê hêrişî vera heme merdimîye de yenî kerdene.”