Çalakîya grevê vêşanîye ya Nurîye Gulmene û Semîh Ozakçayî ke seba agêrayîşê karê xo daybî destpêkerdiş, roja 195. de dewam kena. Her di çalakgerî zî roja 76. ya grevê vêşanî ra nata zîndan de yî û çend hewte yo zî Nêweşxaneyê Zîndanê Sîncanî de yenî tepiştiş.
Heto bîn ra her roje Caddeyê Yukselî de seba piştîdayîşê çalakîya Nurîye û Semîhî çalakîya ‘Ma karê xo tepîya wazenî’ yena viraştiş. Na çalakîye zî roja 315. de dewam kena.
Çalakgerî sey her roje waştî ke Caddeyê Yukselî de vernîya Abîdeya Heqê Merdiman de îzehetêk bidî çapemenîye. Çalakgerî seba nêyî Ziqaqê Konurî de ameyî têhet û waştî ver bi Caddeyê Yukselî bimeşyî. Labelê polîsan bi barîyeran ra vernîya înan girewt û nêverda ke çalakgerî bimeşyî. Cok ra çalakgerî zî vernîya qalxananê polîsan de îzehetêk dayî çapemenîye.
Avûkatê şarî rûmetê ma yî
Çalakgeran va ‘çalakîya Nurîye û Semîhî roja 315. de dewam kena’û wina dewam kerdî: “Wa Nurîye û Semîh tepîya biagêrî karê xo. Avûkatê şarî rûmetê ma yî. Wa avûkatê Nurîye û Semîhî serbest bêrî veradayîş.” Reyna çalakgeran pankartê ‘Wa Nazîfe Onaye serbest bêra veradayîş’akerdî û slogananê ‘Wa Nurîye û Semîh tepîya biagêrî karê xo’, ‘Wa bicuyo grevê ma yê vêşanî’ û ‘Ma şar î, heqdar î, ma do qezenç bikerî’ eştî.
Dima ra polîsan mudaxale kerd Polîsan pankartê çalakgeran dirna. Çalakgeran zî na vîste de sloganê ‘Ma do bi xoverdayîşî qezenç bikerî’eştî. Ti kes nêame tepiştiş û çalakîye bi kuwayîşê çepikan qedîya.