AKP-Erdogan, bi ferasetê Tirkîyeyêka statîkopwarêre ke seserra 21’ine de zî estbîyişê xo bido domnayiş, bîy îqtîdar. Hewceyîya aqilê dewleta xorî zî nê fikrî rê teşne bi. Labelê vernîya ney ferasetî de kelemêko asê, Hereketê Azadîye yê Kurdistanî est bi.
Serranê 80’î ra na het, heme hikumatê Tirkîya bi sozê çinêkerdişê na xoverdêrîye, bîy îqtîdar. Bi yewîtîya sîyaset, çapemenî, artêşe, dîyanet, sazî û dezgeyanê aborî û perwerdeyîye, verva xoverdêrîya şarê kurdî, şerrêko qilêrin da ramitiş. Serranê 80’î ra na het bi desan hikumat û serfermandarîy bi no hesret amey û bi no hesret şîy. Hereketê Azadîya Şarê Kurdî roc bi roce daha zî gird û bihêz bi. Zê hemleyêkê peyênî, çimsûrêko zê Erdoganî, hetê na pergale ra ame vînayiş.
Kesayetîya Erdoganî kesayetîyêka taybet a. Merdimêko bixirs û kîndar o. Bi ferasetê “min dime ra tofan” têgeyreno. Seba resayişê mexsedê xo ol/dîn zî tede heme rayir û dormey bi westayî, bi kar ardîy. Bi nê ferasetê xo, heta nika bi qaso ke ti hikumatêke nêşikabi bigero, kurdan ra zî vengîy girotîy. Heta serra 2012-13’ine seba şerrê xo yê topyekûnî binesazîya xo awan kerde. Bi goreyê xo ra kelemê ke do rayira ey sero bibê asteng, berteref kerdîy.
Hesabê Erdoganî bi qaso ke ey zî texmîn nêkerdê, weçînayişê 1’ê Hezîrane de têk şîy. Tirkîya ver bi duştê hesabo ke hetê Erdogan-Dewlete ra amebi kerdiş, şîyê. Tersê averkewtişê sîyasetê hereketê kurdan yê aştî û Tirkîyeyêka demokratîke, bîy qapûsê Erdoganî-Dewlete. Erdoganî no ters zî bi kar ard û mîyanê dewlete de dormeyê ke îqna nêbî zî, seba şerrê topyekûnî yê verva kurdan îqna kerdîy.
Pîlana “cûmkerdişî” dim nê îtîfaqî ra kewte merîyete. Heme kadroyê Ergenekon, balyoz, nîjadperest û netewperestan bi gefê “No şerrê estbîyiş û çînêbîyişî yê Komara Tirkîya yo”dormeyê na plane de kom bîy. Şerrê topyekûnî yê verva şarê kurdî bi xerepnayişê bajaranê kurdan dest pê kerd.Cizîre,Sûr,Gever Nisêbîn û Şirxex...
Şerr, serre de hafizaya tarîxî, verva heme erjanê şarê kurdî bi. Na hovîtîye Sûra Amede de dewam kena. Hafizaya tarîxî yê Sûrî qaşo zê mîrateyê merdimayîye bin ewleyîya UNESCO de ya. La baş yeno zanayiş ke têkilîyê mîyannetewîyan de ke menfîetê aborî est bê, heme erjî pereyê werdî yê. Kîna Erdoganî ya verva erjanê Şarê Kurdî wina pîla ke, gunîya kurdan firr bikero, zerrîya ey rihet nêbena.
Seba pawitişê taxanê Elî Paşa û Lalebeyî rayira tewir derbasdare, tekoşîna şarê kurdî bixo ya. La rewşe zî orte de ya. Verva êrîşê hovan pêhetameyişê însanan, bi raştî zehmet o. Do vergê Erdoganî êy taxan zî wêran bikerê. La wa no bi rihetî nêbo. Wa vengê nêrazîbîyişî vecîyo. Sendromê Şarê Cihûyî yo tewir pîl ke dim qirxûnî ra xo dayo teber, bi awayêko bêveng razîbiyişê qirxûnî rê yo. Zê mêşina ke şêro kardîya xo ver, têgeyray.
Na rewşe de, Kurdistan de xoverdêrî zor û zehmet a. Na raştîye gere hetê her kesî ra bêro zanayiş. La xora, taybetî û sirrê tekoşîna Şarê Kurdî zî naye de lûmite ya. Çi aste de beno wa bibo, gere xoverdayiş bibo. Gere şarê Sûrî, bi tenê nêmano. AKP-Erdogan çende xo bihêz vînenê, didi endeyî zî xo ra tersenê. Wengêko tewir qic zî goş û mezgê înan de, beno zêvengê bombeyan. Tesîrê vengê doman yan zî dayikêka Sûrî, goşanê Erdoganî-Dewlete de bambaya atomî, zêdêrî yo. Her çende ro xo mikûr nînê, bieysê zî...