Hemsereka Kongreya Komelê Demokratîke û Parlamentera HDPyî ya Colemêrgî Leyla Guvene qezaya Cizîrî ya Şirnexî de bi keyeyê ke domanê înan mabênê 2015 û 2016 de wextê xoverdayîşê xoîdarekerdişî de şehîd bîyî de ameyî têhet.
Parlamenteranê HDPyî ra Salîha Aydenîze, hemserekê şaredarîyê qezayan û sewbîna xeylê kesî beşdarê pêvînayîşî bîyî. Guvene tîya de qisey kerde û va ‘Cizîr bi xoverdayîşê xo derbasê tarîxî bi’ û wina dewam kerd: “Ez Mehmet Tûnç û Asya Yuksele vîr ana. Ma do ê ke nê qetlîyaman kerdî bivejî werte. Ê do tarîtîye de nêmanî.”
Guvene qiseykerdişê xo de qala xespbîyayîşê şaredarîyan zî kerde û wina va: “Qayûmî pereyê şarî talan kenî. Heme cayan de talanê înan vejîya werte. Înan faturayê sexte viraştî û pereyê şarî talan kerdî. Nika zî bi ceza û komployan dest ser nayî şaredarîyan ser. Kurdî cuya bênasnameyî qebul nêkenî. Cok ra ma vanî ke ma îttîfaqê xo virazî. Yan ma do îttîfaqêkê Kurdîstanî virazî û serbikewî, yan zî dagîrkerî do erdanê ma ser o kayanê xo bidomnî. Ma muhtacê ti kesî nîyî, ma do serbikewî.”
Guvene û embazê aye dima ra şîyî keyeyê Mahsûm Pamayo ke vera tecrîdî de canê xo feda kerdbî û dima ra şîyî zîyaretê mezelan.
ŞIRNEX