Fatma ADİR Ma weçînayîşê 24ê Hezîrane de ver bi peynîye şonî. Mîyanê 2 hewteyê peyênan de kam do se vajo û senî hereket bikero, zaf muhîm o. Reyna pêşnîyazê ke seba çareserîye bêrî pêşkêşkerdiş zî muhîm î. Problemê bingeyîn û esasî yê Tirkîya çi yî? Do tesîrê partîya ke nê probleman bîyaro rojeve û çareserîyêka şênbere pêşnîyaz bikero, hîna zêde bibo. Partîya ke problemanê şarî reyde mijûl bibo û netîceyanê ci nîşanê şarî bido, do tesîrê aye partîye zêde bibo. Hetta eke merdim nînan tayê çîyanê dîyayîşkîyan reyde destek bikero, hêzê ci hîna zêde beno. No eynî wext de do bibo sebeb ke aye partîye vîr de bimano. Reyna tesîrê uslûbêko raşt û tesirinî zî zaf o. Yanî eke partîyêk ziwanê cuye reyde qisey bikero û bibo tercumanê hîs û zerrîyan, o wext do tesîrê aye hîna zêde bibo. Wexto ke merdim problemanê Tirkîya rêze bikero, problemê esasî yê Tirkîya demokratîknêbîyayîş o. Eke welatêk demokratîke nêbo, problemê ke ewja de bivejyî zî do gird bibî. Merkezê problemê ewleyî, ekonomî û komelkî ke no weçînayîş de erzîyenî rojeva Tirkîya de rolê îdareyê faşîst û antîdemokratîke esto. Têkoşînê azadî, seyyewbînanî û heqî yê şarê kurdî problem nîyo. Problem zîhnîyeto ke vera bikarardişê nê heqan de vindeno bi xo yo. Yanî înkar, asîmîlasyon û qirkerdiş û polîtîkayê qirkerdişî bi xo problemê tewr girdî yî. Yê ke ziwan û kulturê kurdan qedexe kenî û çinî hesibnenî, şerm nêkenî xo kurd hesibnenî. Îdare û zîhnîyeto ke wina keno, ganî bêro derbazkerdiş. Ê zîhnîyet û îdare hem problemêkê ganî bêrî derbazkerdiş î û hem zî vernîya şaranê Tirkîya de asteng î. Problemo diyîne ke xo dibare keno krîzê ekonomîye yo. Sebebê krîzê ekonomîye şero ke yeno domnayîş reyde eleqeder o. Plankerdişê serrêkî yê Meclîsî de para tewr girde seba xopawitişî ameye cîyakerdiş. Na rewşe bena sebeb ke feqîr hîna zaf feqîr, dewlemend zî hîna zaf dewlemend bo. Herkes bi hawayo baş zano ke para ke seba xopawitişî rê ameya cîyakerdiş, hîna zaf seba hêrişî yena bikarardiş. Her roje bi seyan teyarayê keşfî fireni û barê înan ra qet qale nîna kerdiş. Reyna faturaya teyara, helîkopter û leşkeran zî ganî sîyasetmedaran ra bironîyo vernîya weçînitoxan. Çîyo ke problemê ekonomîye ra hîna muhîmêr o yo ke merdimî mirenî. Netîceyê şero ke domîyeno de merdimî mirenî û no zî beno sebebê krîzê komelkî û Tirkîya de cîyabîyayîş hîna zaf bivirazîyo. Nika îqtîdarêko faşîst ke ser mergê merdiman ra polîtîkayan domneno, esto. No îqtîdar weçînayîş de hîna zaf operasyon, hêriş, qirkerdiş, qetilkerdiş û mergan wead keno. Sey Cizîr, Şirnex, Nisêbîn, Gever, Hezex û Sûrî. Yê ke bajarê ma veşnayî, rijnayî û qetlîyaman viraştî, nika zî yenî kurdan ra reyan wazenî. Hetta Erdogan û AKP no het de HDP sucdar kenî. Ewro netîceyê demokratîknêbîyayîş û hêrişê heqê sîyasî, kulturî û ziwanî yê şarêkî kerdiş tena krîzê ekonomîye nêbîyo. Warê perwerdeyî kreş ra heta unîversîte tepîya mendo. Sîstemê perwerdeyî ke baş nêbî, nika tewr bin de yo. Problemê ke weşîye de yenî cuyayîş, problemê tewr girdan ra yî. Problemê ke welat de yenî cuyayîş zaf î, muhtewaya nê nuşteyî derbaz kenî. Nê problemî tewr zaf benî sebeb ke şîddet bivejîyo aver. Cuya merdiman zaf ercan bîya. Her roje cinî û domanî hetê tayênan ra yenî qetilkerdiş û nêyî îstatîkan de dîyenî. Ewro wina bîyo ke komel êdî vera nê mergê qetlîyam û mergan de reaksîyon nîşan nêdano. Şîddet têkilîya merdiman, keye, ziqaq û cayê karî de bîyo hakim. Ewro tam yew rewşa travmayî yena cuyayîş. Rewşêka winasî mergê kedkaran û ewleyîya karî de yena cuyayîş. Partîyê ke ewro bi îdîaya xelqkerdişê alternatîfî polîtîkayan domnenî, ganî qasê tespîtkerdişê problemî, ganî nîşan bidî ke ê adresa çareserîye yî. Yê ke erjnayîşê pêroyî, tespît û uslûb ra bixelisno, nîno vîrîkerdiş. Zerrî, ruh û wijdanan de cayê xo gêno.