ALÎ ŞEKER / PÎRHA / ERZÎNGAN
Kurdî bi taybetî vera polîtîkayanê asîmîlasyonî de hewl danî kultur û ananeyanê xo bipawî. Bitaybetî kurdê elewîyî ke herêma Dêrsimî de cuyenî, bi hezaran serran o ke cilanê herêmîyan xoradanî. Şelwarê ke cinîyî xoradanî, nika tewr zaf teberê welatî de raştê eleqeyî yenî.
Cinîya bi nameyê Fîlîz Dîkme Pakka Rasteyê Bugdayî yê Erzînganî de dikanêk akerda û ewja de cil û çîyanê xemilnayîşî roşena. Pakkaye nameyê dikanê xo ‘Reyna Bê’ ronayo û nizdîyê 5 serrî yo no dikan akerde yo. Nameyê dikanî bi hêvîya ‘yê ke ame, wa reyna bêro’ ameyo ronayene û no dikan de şelwar, çente, êleg, şewqa û sewbîna çîyê herême roşîyenî.
Pakkaye dîyar kerd ke aye verê cû ziqaqan de çîyan rotêne û wina dewam kerde: “Mi verê cû dewan de çî-mî rotêne. Mi 5 serrî verê nê dikanî akerd. Verê cû mi şelwarî teber ra herînayêne û rotêne. Labelê nika ez bi xo derzena. Ez qumaş herînena û goreyê waştişî derzena. Şelwarê mi aydê Dêrsim û sewbîna herêman î û bi taybetî kesê ke Ewropa ra yenî tercîh kenî. Wexto ke yew yeno dikan, bi Tirkî nêvano ‘merhaba’ bi Kirmanckî vano ‘Ma bixêr’ û no vatiş ma kêfweş keno. No zî nîşanê ma dano ke şarê ma wazeno bi ziwanê xo qisey bikero. Ma kura de cilanê herêmîyan bivînî, anî dikan. Erzîngan de tena ma nê karî kenî. Çîyê winasî tena dikanê ma de estî. Yê ke ame, reyna yeno. Tîcaret muhîm o labelê karê kulturî kerdene, hîna muhîm o.”