Taxê Alîpaşa û Lalebeyî yê qezaya Sûrî ya Amedî ke bi aşman o binê abluqa de yî û awe û cereyanê înan ameyî birnayîş, ê cayan de rijnayîşî dewam kenî. Taxijî herçiqas ke awe û cereyanê înan çin î, reyna zî fek taxa xo ra veranêdanî û bêvengmendişê rayapêroyî ver zî bireaksîyon î.
Vera rijnayîşan de 23ê Gulane de Platformê Rijnayîşê Sûrî rê Nê ame awankerdiş û no platform bi welatîyan têkoşîn dano. Babete ser o Hemverfeka Platformî Buşra Cîzrelîogullariye qisey kerde û vera rijnayîşan de reaksîyon nawite.
Cîzrelîogullariye va ‘qerarê rijnayîşo ke bin nameyê Vurîyayîşê Bajarvanî de yeno kerdiş 30ê Teşrîna Verêne de ameyo girewtiş û seba çinîkerdişê qezaye ameyo girewtiş’ û wina dewam kerde: “Nizdîyê 4 aşmî yo ke Sûr de şar vera rijnayîşan de xover dano. Piştîdayîşêyewbînan û têkoşîno ke aşma Ramazanî ra nata yeno dayîş, dewam keno. Welatîyî 4 aşmî yo ke vera bêcereyanî, bêawe û problemanê bînan de têkoşînê xo bi hawayo qerardarî domnenî.”
Tîya de rîtuelanê dînîyan reyde kay kenî
Cîzrelîogullariye dewamê qiseykerdişê xo de va ‘dewlete taxan de şerêko psîkolojîk û zorî meşnena’ û wina domnaye: “Cok ra êdî kardî resaya este. Çend rojî verê taxa Alîpaşa de Keyeyê Tazîye ame rijnayîş. No zî vera erjanê komelî de hêrişêk o. Îqtîdaro ke hetêk ra Keyeyê Tazîye rijneno, heto bîn de camî, îbadetxane û sewbîna cayanê îbadetî virazeno û bi no hawa bi rîtuelanê dînî kay keno. Kesê ke rijnayîşî qebul nêkenî, keyeyê înan bi hawayo zorî yenî rijnayîş. 4 rojî verê keyeyê şarî bi eşyayê ke mîyan de, ameyî rijnayîş. Dima ra polîsan 3 kesan tepişt û welatîyan derb kerd. Yê ke vera rijnayîşî de bêveng manenî zî ortaxê nê sucî yî.”
Cîzrelîogullariye peynîya qiseykerdişê xo de va ‘Sûr de rijnayîş dewam keno û heto bîn ra her ke şono herêma rijnayîşî hîra kenî’ û wina dewam kerd: “Nika zî Sûr ra dima vera xo dayî Fîskaya. Ganî herkes vera rijnayîşan de hesas bibo.”
AMED