Çewlig de çarçoveyê aktivîteyê 8ê Adar de panel viraziya û parlamentera HDP yê Stenbol Huda Kaya zî tewr bî. Kaya hayr ant qetlîamanê dewlet ser û vera nê qetlîaman bêvengiya welatanê Awrûpa rexne ker.

Panelo ke bi slogana “Bi ceniya azad hetê netewa demokratîk” hetê KJA Navendê Kulturê Şaredarî de viraziya bi desan cenî bi kincanê xo yê gelerî tewr bî. Salona panelî de posterê ceniyê şoreşger ke Parîs û Sîlopî de amey qetilkerden aliqniyay. Panelo ke bi vinderdişê hurmet destpa kerd bi damusnayişê sînevîzyonî dewam kerd. Badê sînevîzyon bi çepikan ra piya, sloganê zey ‘Cenî, cuwyan azadî” berz bî. Hemseroka HDP yê sûk Zerrhin Berdîbek qiseyê akerdin yê panelî kerd û aşkere kerd ke, ganî vera faşîzmê AKP û Seray ke vera xoza, însan û ceniyan êrişanê xo kena jêde xoverdayiş girdêr bibo.  


Şexs dê ceniyan eyar danê civakî

Parlamentera HDP û qiseykerdoxa Kongreyê Îslama Demokratîk Huda Kaya zî da zonayen ke, şarê tirk, zilmo ke dewlet kurdan rê ferz kena ra hayedar niyo. Kaya va, bado ke qisey û her çî maneya xo vinî bikero, maneyê cuwyanî zî nêmaneno û aşkere kerd ke “yê ke ma rê rey danê zî, nêdanê zî şarê ma yo. 

Kaya hayr ant tekoşînê ceniyan ser û hina dewam kerd: “Senî ke 28ê Sibatî de ser ceniyanê dîndar eyar day hometî, ewro zî ser ceniyanê kurd wazenê eyar bidê civakî. 8 rojî erd de ternayişê bedenê Dayika Taybet çiyekê zane yo”. 


Jû cenî şina, bi hezaran yenê

Huda Kaya vist vîrî ke, hikûmeta AKP semedo ke sebrê şarê kurd bianco noqteya peynî, bedenê ceniyanê kurd kena viran û kuçeyan de teşîr kena û da zonayen ke, jû Dayika Taybet şina la pey ci de bi hezaran cenî xoverdayiş ramenê. Kaya da zonayen ke, jew wexto ke cenî tarix nuştenê ra vîyêrenê ra. 

Parlamentera HDP hayr ant xoverdayişê Hz. Zeynep dûştê zalim û camêrdanê yobaz û serdest ser û hina va: “Wextê kesê ke vatî ‘ma neslê dîndar kenê pîl’ de tecawiz se ra 40, alkol se ra 700, cînayetê ceniyan se ra hezar û 400 bî jêde. Mudaxîlê porê ceniyan, zewijyayişê emrê qijkek, qijanê ceniyan, mudaxîlê her çî bî. Ver çimandê pêrokîn dinya de bi wehşiyane bodriman de ceniyan qetil kerdî.  


Kişta Tirkiye de her çî gul û gulîstan o

Parlamentera HDP Huda Kaya hayr ant rojdema şaranê tirkiye ser û da zonayen ke, wexto ke kes qenalanê tirkan temaşe keno her çî zey gul û gulîstan o. Kaya va, jû hetî ra şarê kurd raştê zilm û qetlîamanê bedewî yeno, la heto bîn ra yê ke wijdanê înan çinî bî û merdimatî ra vejyayê estê. 

Huda Kaya da zonayen ke, çiyê hinayî Almanya ya wextê Hîtler’î de zî amey cuwyayiş û hina va: “Almanya ya Hîtler’î de, tayn hetî bin zulmî de bî, la tayn hetî zî vatî ma qûwetê, ma îxtidarê. La ewro Rojawa şerm keno ke behsê nê kerdenanê Hîtler’î bikero. Yê ke bi qûwet û serxoşiya Hîtler’î xo bi qûwetîn zanay, badê des serran fam kerdî ke ey senî şaran qir kerd û eştî firinan. La o çax wext rewna ra ravêrd be. Kaya va, ewro şarê alman o lîderî ra şerm keno û da zonayen ke, roj do bîro, tirkiye zî do na şermî bicuwyo. 

Heto bîn ra sûkanê bîn yê Vakûr’î de zî nûmayişê 8ê Adarî ramenê.  Mêrdîn, Colemerg, Amed, Mereş û xêlê cayanê bîn de zî panel, rayşiyîn û aktivîteyê 8ê Adar viraziyay û bi hezaran cenî are bî. 


 DÎHA/ÇEWLIG 





Kovara JÎNEOLOJÎ ray de ya 


Hûmarê 1. yê Kovara Jîneolojî, Roja Cenîyanê Kedkar ê Dinya de reseno cenîyan. No hûmarê kovare de babeta ‘Krîzê Zanistê Komelî û Jîneolojî’ ser bi herayî ameya vindertiş û ameyo armanckerdiş ke kamîya cenî newe ra dinya de bêra xelqkerdiş.Hûmarê yewine yê Kovare ser Mudira Karê Nuşteyan a Kovara Jîneolojî Ayşe Berktay qise kerd. Berktay vat ke ê taybetê hûmarê yewine yê kovare, 8’ê Adare de bal antişê xoverdayîşê xorayîrberdişan û têkoşînê cenî ser vejenî, Kovara Jîneolojî cuya alternatîf ser gamêko muhîm a.


Çima kovara jîneolojî

Berktay va: “Ma tena îtîraz nêkenî, tena xover nêdanî, senî yew cuya wazenî bi aşkera nîşan danî. Na kovare do demo vîyarte ra nika şopê zanistî ra roşn bitepîşa. Çi heyf ke zanistî komel û cenî ra ameyo dûrvistiş û destê îqtîdarî de bîyo zey silgirêk, la ma zanenî ke agahî silgirê destheladarî nîyo. Ma zî bedilnayîşê û açarnayîşê na rewşe ser mîyanê têkoşînî de yî, ma qet na babete de bêtêkoşîn nêvindertî û nêvindenî zî.” 


 DÎHA/STENBOL