Sebebo tewir pîl yê rewşa ewroyine yê şarê kurdî, pêhetnêameyiş û awannêkerdişê yewîya neteweyî yo. Seba naye zî şaro tewir qedîm û xocayî yê Rochelatê Mîyanênî, tim bi qetlîam, qirkerdiş û terteleyan reyde ribiri mendo. Welat û Şaro Kurd di mîyanê dewldetan de ameyo barrekerdiş.
Heke di şerrê yewînî yê Cîhanî de yewîya Kurdan bibayêne, kurdîy zî do ewro wayir axe û welatê xo bîyêne. Her çende di tarîx xeylê doran seba pêkardişê yewîya neteweyî û azadî, hewldanî ameyê dayiş zî, bi ser nêkewtê û bedêlê naye zî zaf giran ameyo dayiş.
Fersendê tarîxî encex se serre ra dorêke yenê vernîya şaran. Ewro, badê se serre yê perçekerdişê 2’ine yê welat û Şarê Kurdî,reyna Rochelato Mîyanên yeno dîzaynkerdiş. Şaro kurd wayir fersendêkê pîlî yo. Seba ke no fersend ro azadî agêro û Şaro Kurd zî di mîyanê malbata şaranê dinya de, bi kamî û çandê xo ca bigero, zê her wextî hewceyî bi tifaq û yewîye est a. Heke no fersend zî bêro hebakerdiş, belkî fersendêko winayin dorêka bîne, bi dest nêkewo.
Kongreya Netewî ya Kurdistanî KNK, di 12’ê Hezîrane de xebata pêkardişê yewîya neteweyî da destpê- kerdiş. Heyete di na çarçova de bi heme partîyanê sîyasîyan, sazî û dezgeyê sivîlan û xeylê risipê, roşinvîr, nûştox û akademîsyenanê çar perçeyanê Kurdistanî dir amî pêhete.Di peynîya na xebate de, qerarê Şêwrê Netewî ame dayiş. No Şêwro Netewî di 15 û 16’ ê Hezîrane de, bajarê Silêlmanîya de pêk ame. Çar perçeyanê Kurdistanî ra 300’î zêdêrî deelegey tewrê şêwrî bîy û di rocîy nîqaşîy amey kerdiş.
Bi qasoke yeno zanayiş di tarîxê Şarê Kurdî de, yewîn dora çîyêko winayin virazîyeno. Îtîya de çîyo sosret helwesta KDP ya. KDP di şêwro netewî de ca nêgirewt. Nizdê 20 serre yo ke di Başûrê Kurdistanî de, nîmdewletêke est a û Mesût Barzanî di qada mîyannetewî de zê Serokê Kurdistanê Federalî yeno naskerdiş.
Her çende Silêmanîya zî bajarêkê Kurdistanîya zî, di esasê xo de gere no şêwr,di Hewlêr de biamebêne viraştiş û KDP û Berzanî, bi her awayî mazûvantîya bikerdê û di asta tewir berze de zî tede ca bigirewtêne. La çi heyf ma helwestêka winayine nêdî.
Gama ke merdim awneno na helwesta KDP, ke seba azadîye referandûm virazena ra, merdim fehm keno tu derdêkê KDP yê kurd û Kurdistanî çîn ya. Reyna merdim fikirîyeno gelo seba Şarê Kurdî di na rewşe de yewî yan referandûm hewce yo. Beno ke xeylê kesîy pawitoxîya KDP bikerê û tay hincetan bîyarê. Hincetîy çi benê wa bibê gere KDP di asta tewir berze de tewrê ney şêwrî bibêne û heme lomeyê xo biardêne ziwan. Xo serekê Kurdistanî nîşandayiş naye ferz keno.
La ma vînenê ke tu derdêkê KDP yo winayin çîn yo. Berzanî zê destbirakê xo Erdoganî di derdê îqtîdarê xo de yo. Gelo KDP û heme kesanê ke referandûm zê azadîya Kurdistanî vînayê, derheqê yewîye de çi fikirîyenê. Gelo yewî yan referandûm seba ameyîya Şarê Kurdî, raver a. Pêkameyişê yewîya şarê çar perçeyanê Kurdistanî, referandûmo tewir pîl nîyo gelo?
Heman helwesta KDP di hewldananê 2013’ine de zî vernîya yewîya neteweyî de bibî astenge. Gere Şaro Kurd ney hesabî êdî pers bikero. Heke no îxanet nîyo se, îxanet çi yo?