Nuştox Yaray vat ke komxebate ra goreya beşdarî, yewîyeya kurdan omîdêk bî û wina vat: “Komxebate de tena yewhetî çinêbî, fîkrê sîyasî ra kesî estbî û her kes seba averberdişê ziwanê xo kurdî ameybî têhet.”

LÊL AMED - AMED

Amed de bi beşdarîya nêzdî 300 nuştox, akademisyen, perwerdekar, weşankar, karsaz, sazîyê cenî, kultur û hunerî komxebata ziwanî ame viraştiş. Seba averberdişê ziwanê kurdî 27 kesî ra heyetê rayberîye ame awankerdiş. No heyet do bi pêşnîyaran seba averberdişê ziwanê kurdî do nexşereyêk dîyar bîkero.

No komxebata ziwanî ra bi nameye Platforma Qelemî ya Cenîyê Mezopotamyayî, nuştox Sultan Yaray zî beşdar bî.

Xebatêka zaf muhîm bî

Endama Platforma Qelemî ya Cenîyê Mezopotamyayî û nuştox Sultan Yaray aşkera kerd ke na komxebate seba ziwanî xebatêka zaf mûhîm bî, çimkî tena rasteyê ziwanî ra ney, heme rasteyê cuye ra kesî beşdarî komxebate bibê û wina vat: “Heta nika tena rasteyê ziwanî, xebata ziwanê kurdî kerdî la na komxebate de seba averberdişê ziwanî 12 heyet amebî awankerdiş û heme rasteyî ra kes estbî. Heme heyetan de seba averberdişê ziwanî krîtîk ameyî kerdiş û peynî zî nê pêşnîyaze zî dîwanê komxebate ra zey raporan ameyî pêşkeşkerdiş.”

Seba yewîyeyî omîdek bî

Endama Platforma Qelemî ya Cenîyê Mezopotamyayî Yaray bal ont ser yewîyeya kurdan û vat ke na komxebate ra goreya beşdarî, yewîyeya kurdan omîdêk bî û wina domna: “Komxebate de tena yewhetî çinêbî, fîkrê sîyasî ra kesî estbî û her kes seba averberdişê ziwanê xo kurdî ameybî têhet. Demo ke babete bena ziwan her kes wayîr vejîyeno. Komxebate de ame pêşnayezkerdişî ke wa êdî Newroze zey sîyasî ney, zey kulturî bêro pîrozkerdiş. Hewna komxebate de vejîya verkî heme rasteyê sîyasetê ma de ziwanê kurdî bîvejo ver. Ziwanê kurdî tena rojbaş û ziwanê min qiym nêkeno nîyo. Komxebate de vejîya verkî ziwanê ma heme rasteyê cuye ra beno cewab. Ez bawerêka do sozêk ameyî dayîş do bêrî cayê xo.”

Persgirek ney nê çareserî esas o

Yaray dîyar kerd komxebate de taybetî persgirekê ziwanê kurdî ser nê çareserî ser vindertî û wina qedîna: “Şarê kurd êdî nê şarêk seserrî verî yo, çimkî êdî teknolojî heme rasteyê cuye de xo nişan dano û bi yew ziwan zî cuye êdî nêdomyeno. Dewleta tirk hetanî nika politikaya bi yewziwanî nêzdî kurdan bî. Taybetî Kurdistanê Rojawan, Rojhelat û Başûrî de çi heyfo ke ziwanê kurdî ganî yo labelê Kurdistanê Vakûrî de ziwanê kurdî nêmerdo la nêweş o. Komxebate de taybetî kanalê kurdî de bernameyê domanan ser ameyî vindertiş, çi heyfo ke Zarok TV xo tena domdar keno, no ser elaqaya domanan nêonceno. Êdî heme rasteyê cuye de ziwanê kurdî esas bibo û na komxebate do seba averberdişê ziwanê kurdî wesîleyêka gird bibo.”