Çend rojî verê cû çend parlementerê AKP yew pênîyazname day meclîs û pêşnîyazname de wazenê wa tutê qijî yê ke raştê tecawuzî ameyê bi tecewuzkaranê xo reyde bizewicê. Wayîrê pêşnîyaznameyî parlemenetê AKP Ramazan Can o. Goreyê Ramazan Canî Tirkîya de 3 hezar tutî estê ke binê 18 serrî de yê û bi hewayo resmî zewecnaye nîyê. Yanê Ramazan Can vano ke, ma qanûn veje ke wa nê hîrê hezar kesî bi hewayo resmî tecewuzkaranê xo de bizewicê. Yanê wa tecewuzkar kênaya ke tecewuzê ci kerdo dir bizewicîyo. Serekwezîr Bînalî Yildirim û Wezîrê Edeletî Bekîr Bozdag zî sey Ramazan Canî fikrîyeno. Xora xebara ey no pêşnîzname ra esta. Serekwezîr zî vano ‘Tirkîya de 3 hezar mexdurî estî û ma înan bizewicne’ Çi ecêbo ke AKP her tim kena ke zewecnayîş teşwîq biko, belkî yeno şima vîr serekwezîrê ê wextî Ahmet Davutoglu meydan bi meydan geyrayêne û şarî ra vatêne ‘ Eke şima bizewicê ma çeyiz danê şima. eke şima biwazê banqayî pereyan danê şima. Xora ma zanê ke Serekkomar Erdogan zî her tim cinîyan şîret keno û vano ‘Ganî şima hîrê tutan bîyarî dinya. Hîrê tutan ra kêm nêbeno. Cinîya ke wayîrê tutan nîya, cînîyêka nêmcet a’ Yanê AKPya ke nêeşkena welat îdare bikera fek îdarekerdişê welatî ra veradaya û bedenê cinîyan ser o siyaset kena. No sîyaset de cinî her tim mexdur ê û camêrdî pawîyenê.
Xora seke ma zenê halê welatî perişan o. Ekonomî xirab a, hetê heqanê merdiman de îxlalê pîlî qewimîyenê. Tirkîya vera-vera bena sey welatanê Îran, Sûrîye, Misir û Erebîstana Sûûdî. Her roj yew neheqî bena û welat tena AKPîyan rê weş o. Tena ê zengîn û bê derd ê. Bê AKPîyan her kes raştê zulmî yeno û yeno çinkerdiş. La seke ma çend rojîyo ke teqîp kenê na meselaya meşrukerdişê tecawuzî hetê her hetan ra nêna qebûlkerdiş û her kes vera AKP de hêrsê xo nîşan dano. Serekê teşkîlanatanê cinîyan yê AKP yew bi yew AKP ra îstîfa kenê. Bê parlementerê AKP yê camêrd partîyê bînî desteg nêdanê pêşnîyazê AKP. Xora ma musayê ke parlemeterê AKP yê cinî a roje meclîse de ray nêdayê nê pêşnîyazî. Xora ma HDP meclis ra ameya tesfîyekerdiş. Hemserekê HDP ameyî tepiştiş û HDP hewteyo verên tena bi yew kes kombîyayîşê koma xo viraşt. Bê Ayhan Bîlgenî kes zere de çin bi. beno ke nê rojan de CHP zî bêra tesfîyekerdiş. Recep Tayîp Erdogan hînî Tirkîya de bê AKP partîyêka bîne nêwazeno. O tena xo wazeno û wazeno wa tena hukmê ey bivêro.
Ma newe ra bê mesela ser. Ma bi yew vateyê perlementerêka CHP dewam bike. Parlementera CHP vana, no teklîfê AKP şerm o û zîxnîyetê DAIŞî nîşanê ma dano. Ma vajim yew tuta 13 serreyîye raştê tecawuzî amey. Tem 12 kesan aye rê tecewuz kerdo. Gelo a kêna kamcî kesî dir zewecîyena! Rasta ci wexto ke merdim nê çîyan vano yan zî nuseno şermîyeno. Destê merdimî ra nêno nê çîyan binuso. AKPî vanê ‘ Ma semedê hewêk no qanûn vejenê. Hewêk de 3 hezar tutê qijkekî yenê zewecnayîş. No qanûn semedê tecewuzkaran nîyo.’ Temam mavajim mîyan de tecewuzkar çin o. La nê hîrê hezar kesî pêro zî 18 serreyî ra qijkek ê. Hema tut ê. Seno wicdanê şima qebûl keno! Keso ke înan dir zewecyeno xora tecewuzkar nîyo! Keso ke kênaya 13 serreyîye dir keweno mîyanê cile xora tecewuzkar nîyo! Çîyo ecêb zî hem serekwezîr hem zî prlementerê AKPî nê qanûnî pawenê. Merdim înan rê pers bikero. Gelo kênaya şima 13 serreyîye bo şima aye zewecnenê.? Homa nêkero gelo kênaya şima raştê tecewuzî bêra şima wazenê wa tecewuzkarê xo dir bizewecîyo.
Yew menfîetkarê AKP ra Vahdettîn Înce zî çend rojî verê cû çîyêko skandal va. Goreyê ma sknadal o la goreyê ey normal o. Vahdettîn Înce vano, yew kênaya 13 serreyîye eşkena bizewecîyo. Yanê semedo ke nê qanûnî bipawo fek ehlaq û însanetî ra veradano. Ma hînî se vaje! Rojêk yew hevalê mi ortê sohbetî de mi ra va ‘ Xoceyê Serekkomar Erdoganî yo esasî Nureddîn Yildiz o’ Mi ci rê zaf bawer nêkerdibî. La wexto ke mi cigêrayîş kerd û na mesela zî amey meydan mi bawerîya xo ard ke xocayê Erdogan û AKPîyan Nureddîn Yildiz o. Nureddîn Yildiz zî çend serrî verê cû yew qiseykerdişê xo de bi eşkera va, yew kênaya 13 serreyîye eşkena xo ra pîlêr yew kesî dir bizewecîyo. No merdim her ca de bi destegê Dîyanetî konferansan dano û AKP rê xebate keno. Her tewir îmkan dîyayo ey. Yew kanalê televîzyonî dîyayo ci û her şewe uca de qisey keno. Wina aseno ke nika roj roja înan a. Bi zîxnîyetê DAIŞî komelanê Tirkîya newe ra awan kenê. Xora hukmat zî desteg dano înan. Seno ke desteg da Cematê Fetulah Gulenî desteg dano înan zî. Yewz amanêk yew vateyê ulkucîyan estbi. Vatênê, ma zere de yê la fikrê ma îqtîdar de yo. Rast o, her tim wina bi xora. Goreyo ke yeno vatiş nika zî tecewuzkarî vanê, ma zere de yê la fikrê ma îqtîdar de yo.