Yewîya Resnayîşê Demokratîk YRD derheqê zext û zorvajîyanê televîzyonanê Kurd îzahatekê nuştekî da û veng da Yewîya Awrûpa û şarê Kurd ke bikewê hereket. Vizêr Parlementoyê Flaman ê Belçîka de zî seba televîzyonan roniştişeke virazîya.
Îzahatê YRD de vistîya vîrî ke dîktatorîya Erdogan hi Bahçelî ke Tirkîye açarna girotxaneyê Rojnamegeran, nika zî destê xo dergê Ewropa kenê û wazenê ekrananê çapemenîya azad tarî bikerê. YRD dîyar kerd ke tarîkerdişê ekrananê televîzyonanê Kurd do bîro maneya tarîkerdişê azadîya fikir û îfadeyî, ke na jû bingeyê demokrasîya Ewropa ya û wina dewam kerd: “Eke Ewrûpa waştena dîktatorîyo ke hetê serbestîya çapemenî tay mendo ke bikewo lîsteyê sîya xo rê zey fermanekê bivîno, o wext do xîyanetê hiqûq û erjanê xo yê demokratîk bikero.”
‘Seba ke sûcê xo binimno’
YRD vist vîrî ke xisusîyetê taybet yê Stêrk, News Channel û Ronahî TV no yo ke sûcanê wertex yê Erdogan û DAIŞ’î yê dûştê mordemîye deşîfre kenê. YRD aşkere kerd ke rîwalê nayî zî wazenê nê qenalanê televîzyonî bigîrê û wina va: “Qebûlkerdişê qerarê girewtişê nê qenalan, yan zî bêvengîya hemverê no qerarî yeno maneya nimitişê sûcanê Erdoganî û pîyakarîya nê sûcanê ci.”
YRD veng da Yewîya Awrûpa û bi taybetî hikumeta Fransa ke verîya ke berey bibo, qerarê Eutelsatê ya seba vindernayîşê weşanê News Channel, Ronahî û Stêrk TV vinderno. Îzahatî de Yewîya Resnayîşê Demokratîk veng da roşnbîr, akademîsyen û rojnamevanê Ewrûpayî zî, ke vernîya qerarê faşîzan ê dîktatorîya Erdogan-Bahçelî bigîrê û bêveng nêmanê.
YRD veng da şarê Kurd û dostanê ci zî ke, hemverê kerdenanê nêheq û bêhiqûqî vengê xo berz bikerê û şîrketa Eutelsatî protesto bikerê, seba nayî bikewê hereket.
Parlementoyê Flaman de roniştiş
Heto bîn ra vizêr seba televîzyonanê Kurd Parlementoyê Belçîka ê Flaman de roniştişeke taybet virazîya. Roniştişî de ame dîyarkerden ke nê kerdenî dê nîrê qebulkerden. Herzewbîn çalakîyê protestoyî yê Kurdistanijan zî ramenê. Çalakîyan de şîrketê Eutelsat ame îqazkerden û wazîya ke qerarê xo peyser bigîro.