Faşoyê tirk Dewlet Bahçelî fekê akeno û qirreno ha qirreno. Vano gera ma hetanê Şengal bişerî. AKPyî û Erdogan fekê akenî vanî, ma nîverdenê Şengal bibo Qendîla dîyin. Tena qal de nîmanenî eskerî berdo Sîlopî de cakerdo. Berdo Başurê Kurdistan hetê Başiqa de ca kerdo. Xorî wargeh awankerdo. Dinya û Iraq vanî Başiqa de mendişê eskerî tirk korsanîyo. Ayo ke vengdawo eskerê tirk berdo ca kerdo KDP û Mesûd Barzanî yê. La Mesûd Barzanî vano, Iraq vengdayo eskerê tirkî. Iraq vano qet çîyêk hina û peymanêk hina çîno. Tirkê dagîrker ra kam qiseykeno vano hedefe ma de Şengal û Başurê Kurdistan esto. Wa nê çîyê kiştê ke de bimane.
La çîyê sey bomba kewt rojdemê dinya. No çi verê cû zî bi rayîra Redhacker vejîyaya bi werti. La zaf nêkewt rojdemê dinya. Nika tayî çiyê cîya bi. Na reyî Wîkîlîks eynî belge weşanayî. Belgeyan de heme çîyê estî. Belge de qalê Şîrketa POWERTRANS û rotişê neftê (petrol) ke DAÎŞ destnayo ser yeno kerdiş. Goreyê belgeyan POWERTRANS şîrketa zamayê Erdoganî Berat Albayrak a. Berat Albayrak tam 16 serrîyı pê rayîra na şîrketî bi qaçaxî neft roşeno.
Reyna nê belgeyan de çîyêk muhîm vejîyeyo meydan. Belgeyan de verfekê Erdoganî Îbrahîm Kalin’î yew nuştê Berat Albayrakî ra şirawito. Îbrahîm Kalin nuşteyê xo de vano PKK Silêmanî û Şengal de bîya hêz. Gera vernîyê nê çîyê bêro girewtiş. PKK nê cayan de bêro sîlkerdiş. Seba nayî hewce keno ke KDP û Barzanî înan ra yew îttîfaq bêro awankerdiş. Nê cayan de hemberê PKK şer bêro kerdiş. Wexto ke yew ewnêno nê belgeyan, qiseykerdiş û tehdîtê ke tim û tim KDP û Barzanî kenî ano têhet. Hina aseno ke beyntarê KDP û AKP de yew peymanêk ser esasê ke şerê PKK û YPG bikerênê ameya îmzakerdiş.
Ser nê çîyan şîyayîşê Nêçîrvan Barzanî yê Enqera vînayîşê hina zelal keno. Zobî zî kombîyayîşê MGK tirk de zî yew dazanayîş ame vilakerdiş. Dazanayîş de eskerê yeno vatiş ke hemberê Şengal û Başurê Kurdistanê şer ameyo îlankerdiş. Qiseykerdişê peynî yê Mesûd Barzanî zî nê çîyan ser ra bêrênê zêdekerdiş, yew planêk zaf lîşin (qilêrîn) rafîneno ver çiman.
Dewleta keys gêrena û neqirnena ke hêrîşê Şengal û Başurê Kurdistan bikero. Sey seroke Merkezê Pawitişê Şarî Murat Karayilan qiseykerd vat, Şengal û Başurê Kurdistan peynîr nîyo ke pê kardî berênê terakerdiş. Helê wa eskerê tirk şêro uca çi bêro serê înan do dinya bivîno.