Qenala domanan Zarok TV ke 28ê Îlone de bi Qerarnameyê Hukmê Qanûnî (KHK) ame girotiş, 9ê Kanûne de destpa weşana xo ya newî kerd. Îdarekara weşana pêroyî yê Zarok TV Dîlek Demîral aşkere kerd ke înan zanabi ke qerarê girotişî şaş o û da zonayen ke ê cayê ke mendî ra weşana xo ramnenê.
Zarok TV ke yewin qenala kurdî ê fîlmanê kartonî ya, 21ê Adara 2015î de destpa weşanî kerd. Qenala ke raştê eleqeyeke gird amê, bi Qerarnameyê Hukmê Qanûnî 28ê Îlone de bi xêlê qenalanê muxalîf amêbî girotiş. Zarok TV ke 12 qenalê televîzyonî û 11 radyoyê muxalifî ra pîya bi fermanê Erdoganî ameybî girotiş nezdîye 3 aşmîyo giroteyo. No qerarî ser psîkolojîya domanan de tesîreke gird ya negatîf kerd. Seba akerdişê Zarok TV xêlê hewldayenê wayîrvejyayişî bî û herzewbîn kampanyaya îmze amê ramitiş. Padayişê Zarok TV ra dima temaşekerdoxanê ci yê qijkek ke hêrs bî vatî ‘ma nêwazenê kartonfîlmê bi tirkî temaşe bikerê, ma wazenê bi ziwanê xo yê dayike de temaşe bikerê.’ Temaşekerdoxê werdî herzewbîn ardî zon ke Kewelokî dê dûştê Gargamelî de xover bidê û qezenc bikerê. Zey ke temaşekerdoxanê Zarok TV ardî ziwan, bêhiqûqîna vera qenalî vejya teber û Zarok TV heqdar vejîya.
Qerarê girotişî şaş bi
Îdarekara weşana pêroyî yê Zarok TV Dîlek Demîral vist vîrî ke înan 9ê Kanûne de destpa weşane kerdo û dîyar kerd ke qerarê girotişê Zarok TV qerareke şaş bi. Demîral vist vîrî ke seba wedarnayişê qerarê girotişî înan serpirodayişê xêlê cayan kerdîyo û wina dewam kerd: “Serva ke no qerarê şaşî ra bîro ageyrayiş ma waştena ‘destê kamî ra çi yeno bikerê’ kerdbi. Ma reyna vanê ke çîyo ke ma kenê tenya weşana bi kurdî ya.” Demîral seba destegê ci berxudarîya xo temaşekerdoxanê Zarok TV û herkesî ra kerd.
Bi bernameyanê newî dewam kenime
Dîlek Demîral hayr ant destegê temaşekerdoxanê Zarok TV ser û da zonayen ke no destegî xêlê çî da vûrnayiş. Demîral dîyar kerd ke iyê dê cayo ke mendî ra bi bername û fîlmanê karton yê newî û biqalîte dewamê weşanî bikerê. Demîral dîyar kerd ke bado ke qenal amê girotiş xo ra ê nêvindîyay û xebate xo ramitî. Dîlek Demîral dîyar kerd ke înan her ca açarnay cayê gureyînî û va, hinî ma TV ya xo de gureyanê xo danê ramiten.
Zarok TV ser satelayt û frekansê xo yê verên 9ê Kanûne ra tepya weşana xo dewam keno. Seba yê ke hona frekansê Zarok TV eyar nêkerdîyê û wazenê neyra tepya taqîp bikerê, ma eyaranê ci reyna anê vîrî:
Satelayt: TurkSAT 4A 42.0°E
Frekans: 12605 Mhz
Pol: V-Vertical
Symb: 27500
DÎHABER / AMED