Hewldayenê derbe ra dima, çarçeweyê OHALo ke amebî îlankerdiş de 131 televizyon, ajans û rojnameyî ameybî padayîş. Roja padîyayîşê înan ra heta nika xeylê reaksîyonî ameyî nîşandayîş. Bi taybetî padîyayîşê Zarok TVyî ver xeylê hêrsî ameyî nîşandayîş. Hêrs û reaksîyonan ver hukmatê AKPyî tepîya game eşt.
Zarok TVyo ke bi lehçeyanê ziwanê kurdî kirmanckî, kurmancî û soranî weşan kerdêne û kanalê televîzyonî yê sifteyîn yê domanan bî, 21ê adare 2015 de dest pê weşanî kerdîbî. Zarok TV 29ê êlule 2016 de bi Qerarnameyê Hukmê Qanûnî hûmara 668 bi mehneya ‘Seba Asayîşê Milî rê tehdit o’ ameybî padayîş. AKPyo ke heme dinya de dişmenê çapemenîye ameyo îlankerdiş, nika zî xebere dayo RTUKî ke qerarê padîyayîşê Zarok TVyî wedarnayo. Nuşteyo ke RTUKî rê hetê Serekwezîrîye ra ameyo erşawitiş de ameyo waştiş ke Zarok TV wa dest pê weşanî bikero. Koordînatora Pêroyî ya Zarok TVyî Dîlek Demîrele babete ser o qisey kerde.
Tenya bi Kurdî weşan kenime
Demîrele va hetê RTUKî ra înan ra ameyo vatiş ke ê eşkenî dest pê weşanî bikerî û qiseykerdişê xo wina domna: “Nuşteyo ke ma rê ameyo erşawitiş de sey ke çapemenîye de yeno vatiş wina nîyo. Yeno zanayîş ke çapemenîye de yeno vatiş ke ‘Zarok TV do bi mecbûrî mîyanê weşanê xo de ca bido ziwanê tirkî’ la malumato ke ma rê ameyo wina nêvano. Xora ma bêxera lehçeyanê kurdî Kirmanckî, kurmanckî û soranî bi ti ziwanan weşan nêkenî. Ma çîyo ke winasî nêfikirîyenî. Temaşekerdoxê ma domanê kurd û keyeyê înan î.
Wa zext û tedayî biqedyî
Demîrale dewamê qiseykerdişê xo de va ‘ma Walîtîya Amedî rê seba wedarnayîşê moro ke kanala ma ginaybî, yew nuştê erşawito’ û qiseykerdişê xo wina domna: “Walîtîye zî seba viraştişê nê karan Defterdarîye rê yew nuşte erşawito. Ma nînan taqîp kenî. Eke yew problem nêvejîyo ma do roja îne dest pê weşanî kenî. Ma do yewna rey domanan reyde bêrî têduşt. Wa zext û tedayê ke çapemenîye ser o benî, bêrî wedarnayîş û televizyon, radyo û rojnameyê ke ameyî padayîş, wa bêrî akerdiş. Ez ser nameyê xebatkarê Zarok TVyî sipasîyê xo seba kes û keyeyê ke wextê padîyayîşê televîzyonê ma de piştî dayî ma û hetê ma de bî, kena.”
Zonayişê peyser abîyayişê Zarok TV mavêna domananê Kurd û keyeyanê ci de bi kêfweşî amê pêşwazîkerdiş.
BAYRAM BALCI / FRANKFÛRT