Turîzmê Tirkîya krîzê Rusya û Tirkîya ra dima rewşêka xirabe cuya. Cayê turîzmî ke tewr zaf zirar dîyo ra yewe zî qezaya Bodrumî ya Mugla ya. Dima ra zelzeleyo ke şîdetê xo 6.6î bî û 21ê temmuze de qewimîya ra dima rewşa turîzmî hîna xirabêr bîye. Zelzeleyî ra dima hema zî zelzeleyê şenikî virazîyenê û xeylê kesî nêewtanî ke şêrî keyeyanê xo. Zelzele ra dima turîstê ke estbîy zî qeza teriknayî û rezervasyonanê betal kerdî.
Babete ser o Ugur Kaptan, Osman Bîlgîn, Organîzator Bariş Keser û Serekê Komîteya Karê Karmendê Yatî yê Odeya Tîcaretê Behrê Tirkîya ra Tunç Kurtogluyî qisey kerdî.
Kaptanî wina va: “Zelzele ra dima turîstê ke estbîy zî yew bi yewe bajar teriknayî. Sezono verên polîtîkayê îqtîdarî ver ma zirar kerd, emserr zî zelzele bî sebebê karê ma.”
Bîlgînî va ‘zelzele ra dima turîstê ke estbîy zî bajar teriknayî’ û wina donma: “Emser zelzele karê ma ser de zelzeleyo ke şîdetê xo 8.8 o, qasê ci tesîr kerd.”
Şer ma ser de tesîr keno
Keserî qiseykerdişê xo de dîyar kerd ke zelzele ra dima hûmara turîstan se ra 50 kêmî bîya.
Kurtogluyî wina va: “Tena turîzmê yatî de se ra 60 kêmîbîyaîş bîyo. Krîzê ekonomî ra dima zelzele tesîrêko nêbaş ma ser de kerd. Bodrum de tursîtê xerîbî nêmendê. Seba ke aştî çin a, kesê îngîlîz, fransiz û almanî xo tîya ra antî. Şer tesîrêko gird turîstan ser de keno. Tena Gumbet de 38 yatî zirar dîyî. Ma serra 2017î ra bêomid î.”
MUGLA - DÎHABER