Çemê Firatî bi şewan estanikan vano, bi rojan zî bûbikanê çimanî yê domananê xo şiweno. Sey Çemê Dîcle bi hawayo dayîke domananê xo keno pîl. Her domano ke qeraxê Amara de yeno dinya taybetin o. Nînan ra yewe zî Rahîme Akşahîne (Zenda Ekîne) ya. Derheqê Zenda Ekîne de dapîra aye Rahîme Akşahîna 69 serreyî ke bi xo aye pîle kerda, qisey kerde.
Dapîra Akşahîne va ‘her çiqas ke 2 bira û 2 waya aye estbîye, ma reyna zî zaf Rahîme ra hes kerdênê’ û wina domnaye: “Hema Zenda zaf şenik bîye, lajê mi û veyveka ma şîyî bajarê Hamburgî yê Almanya de bica bîyî. Rahîme û 2 birayê aye ma reyde mendî. Zenda domanêka bêveng, cesur û zaf jîhatî bîye. Bi hawayo baş dormeyê xo ewnîyayêne û refleksê aye zaf bihêz bîye. Rîyê aye tim huyayêne û wexto ke huyayêne, rîyê aye de gulî akerdêne. Heme govendan zanayêne û vatişê deyîranê kurdî ra zaf hes kerdêne."
Zaf girêdayeyê herra xo bîye
Dapîra Rahîme qiseykerdişê xo de bale ante şîyayîşê Zenda ya Almanya ser û wina va: “Zenda zaf girêdayeyê ma û herra xo bîye. Wexto ke ameye 15 serreyîya xo, dayîke û pîyê aye, a berdî Almanya. Seba mi û kalikê aye zaf zor bî, ma nêşîna bimusî çinêbîyayîşê aye. Wexto ke şîye Almanya, ewja de zî perwerdeyê xo dewam kerde. Seba ke girêdayeyê herre û şarê xo bîye, beşdarê xebatan bîye û Tevgerê Azadî yê Kurd şinasnaye. Badê ke Zenda 2 serran mîyanê xebatan de mende, 18 serreyîya xo de vera xo daye koyan û beşdarê gerîla bîye."
Ganî îftîxar bikerî
Dapîra Rahîme qiseykerdişê xo de qala vîrardişêkê xo kerde û wina va: “Rojêk lajê mi Zenda reyde qisey kerde û dima ra mi gêra. Mi ra va ‘mi zaf bêrîya kênaya xo kerda, ez nêşêna bê aye bivindera’. Mi zî va kênaya ma rayîrê şeref û rûmetî weçîna. Qerarê cuyayîşê xo aye bi xo bi hawayo azad daye. Herinda ke ti xemgîn bibî, ganî ma aye reyde îftîxar bikerî. Ganî ma bi aye serrîberz û hîna bihêz bibî. Nê vatişanê mi ra dima, lajê mi va ‘Zendaye girêdayîya mi ya hîsin rexne kerde û mi dawetê beşdarbîyayîşê têkoşînî kerde’. Demêko kilm ra dima lajê mi nêweşîyêka girane derbaz kerd. Her çiqas ke tedawîya ci ame kerdiş, reyna zî nêxelisîya û wefat kerd. Ez dima ra musaya ke Zenda wefatê pîyê xo ra tesîr bîya û seba tazîye gêraya. Zenda serra xo ya hîrêyine ke beşdarê tevgerê azadî bîbî, yanî 6ê gulana 2013î de resaya şehadet. A zî sey bi seyan embazanê xo seba şar û welatê xo şehîd kewte. Her çiqas ke ez zaf xemgîn bena, reyna zî ez aye reyde îftîxar kena.”
Ma serrîberz ê
Dapîra Rahîme peynîya qiseykerdişê xo de wina va: “Her çiqas ke mezelêkê daxî çinêbo, mi tazîyeya torina xo tîya de, Xelfetî de viraşt. Zaf kesî beşdarê tazîye bîbî. Qiseykerdişê ke tazîye de ameyî kerdiş zî mi ser de tesîrêko gird kerd. Ez Zenda reyde îftîxar kena. Do tim sereyê mi tîk bibo. Zenda şehîda heme kurdê rûmetinan a. Ez wazena ke mezelêkê aye bibîyêne.”
YAŞAR AKSU / ANF / RIHA