Yewîya Xoverdayîşî yê Şengalîya (YBŞ) ke seba pawitişê Şengalî amebî awankerdiş mîyan de kesê ke welatanê cîya-cîyayan ra beşdar bîyî, estî. Nînan ra yewe zî Rustem Êzidîyo ke kurdê kafkasî yo û Gurcistan ra beşdarê YBŞ bîyo. Rustem Êzidî qala beşdarbîyîş û ciwîyayîşê xo kerd.
Êdî wextê agêrayîşî yo
Êzidî va ‘ez fermano ke êzidîyan ser de ameyêne kerdiş ver beşdarê YBŞyî bîya’ û qiseykerdişê xo wina domna: “Kalikê ma fermananê Osmanîyan ver ca û warê xo verdayî û koç kerdî. Şarê ma zaf fermanî ciwîyayî û her tim remayî. Ma do heta key biremî; êdî wextê agêrayîşî yo. Mi wextê fermanî de heme çîyê xo verada û ez ameya tîya. Cok ra bêxera têkoşîn û azadkerdişê welatê xo, ti şansê ma çin o.”
Merdim nêşkeno
Êzidîyî dewamê qiseykerdiê xo de va ‘ma bi fermanêko gird reyde têrî mendî û nika bi YBŞ ver bi azadîye aver şono’ û qiseykerdişê xo wina qedêna: “Mi wextê fermanî de medya ra eşnawit ke Apocîyî Şengal de resayî hetkarîya şarê êzidî û û ewja de şer kenî. Her çiqas ke mi rayîr û ziwan nêzanayêne zî ez kewta rayîr û bi navîgasyonê telefonê xo ameya Şengal. Kurdê kafkasan ra yê ke sey mi wazenî beşdarê partîye bibî, zaf î. Labelê nêzanî ke senî beşdar bibî. Zerrîya heme kurdanê kafkasijan ma reyde ya. Ez veng dana heme kurdanê kafkas û êzidîyê ke teberê welatê xo de ciwîyenî, ganî êdî biagêrî welatê xo û Şengal û Kurdistanêko azade bi destanê xo awan bikerî.”
ROJWAR KARAKOÇAN / ANF / ŞENGAL