Wesayîta bombebarkerdî ser kuçeyê Merasîm ke mavênê Serokîna Serfermandarî, Qûwetê Asmen û Qûwetê Dengiz’î de yo de, wextê ravêrnayişê qonvoya eskerî de teqîya. Netîceyê teqînayiş de tewr kêm çehar wesayîtê eskerî veşiyay. Teqînayiş qeylê cayanê Enqera de ame hîskerdiş. Netîceyê teqînayiş de heta nika 28 kesî merdî û 61 kesî bî dirbetin. Teqînayiş ra dima, badê 4 deqeyan, bi desan ambûlansî şî cayê biyayiş û dirbetinan sewqê 14 nêweşxaneyan kerdî. Badê biyayiş, cayê teqînayiş bi helîkopteran asmen ra ame qontrol kerdin. Hikûmet jû seat badê teqînayiş qedexe (tomet) yê çapemenî ard.
YPG hedef damusnay
Sermiyanê dewleta Tirk yê ke zey mesûlê her çî Kurdan vînenê, na teqînayiş ra zî YPG mesûl girotî. Dewleta Tirk ya ke rojanê peynî de êrişê Efrîn û Heleb kena, wazena bi jû behane dekewo Sûriye û verniya Şoreşa Rojawa bigîro. Rojanê peynî de zî çapemeniya hetkar îdia kerd ke, xeylê YPGyijî serva êriş virazê ameyê Tirkiye.
Davûtoglu niyetê xo beyan kerd
Serokwezîrê Tirkiye Ahmet Davûtoglu da zonayen ke keso ke êrişa bombeyî viraşt Salîh Neccar o. Davûtoglû îdia kerd ke Salîh Neccar o Sûriyeyij azayê YPG yo. Davûtoglu yo ke bi na îdia ra bi sînor nêmend ravêr şi û bi vatişanê ‘YPG rêxistina teror a’ waşt ke pêrokîn dinya zî wina qebûl bikero. Bi nê vatişan Davûtoglû him niyetê xo yê raştîn aşkere kerd, him zî xo polîtîkayê xo yê esasî deşîfre kerd. Reîscûmhûrê Tirkiye Tayîp Erdogan’î zî zey Davûtoglû teqînayiş ra YPG û PYD mesûl girot û îdia kerd ke destê înan de belgeyî estê, la jû belge zî aşkere nêkerd. Winî ayseno ke, teqînayişê Enqera konseptekê herbê vera Sûriye de ameyo hadrekerdiş. La dûştê îdiayanê sermiyananê dewlet kûlisê Enqera îşaretê jû raştişa bîn kenê. Goreyê îdiayan keso bi nameyê Salîh Neccar ke zey êrişkar ame dasilasnayiş, bi rejîma Esadî ra îrtibat de yo.
Muslim, YPG: Davûtoglû zûrî keno
Ser îdiayanê sermiyananê dewleta Tirk, kişta Rojawa ra cewab ame. Hemserokê PYD Salîh Muslim’î cewab da îdiayanê Davûtoglû û aşkere kerd ke eleqeyê YPG bi teqînayiş çinyo. Fermandariya YPG zî aşkere kerd ke, eleqeyê înan bi teqînayiş ra çinyo. YPG aşkere kerd ke aşkerekerdişê Davûtoglû zûrîyê û da zonayen ke, dewlet bi nê îdiayan bingeyê mudaxaleyê Rojawa û Sûriye kena hadre.
Quwetê Emeg û Demokrasî
Quwetanê Emeg û Demokrasî yê Enqera zî derheqê teqînayişê Enqera de damûstayîn da û da zonayen ke, bi êriş hikûmeta AKP bingehê hêrişanê vera Kurdan kena hadre .
NAVENDÊ XEBERAN