Bi raştî bi vatişanê xo neyartiya xo ya şarê kurdî rê verê çiman de fînenê ra. Seyke qîmê xo bi qirkerdişo ke hêzê înan ê sîlehî (TSK, ewleyî) şarê kurdî ser pêk anê nêarê her wezîrêke bi awayê xo rayîrê qedênayîşê şarê kurdî anê ziwan. 

Veysel Eroglu bi pênaseyê Wezîrê Karanê Aw û Birrî karê xo dano kiştêke, mezgê xo bi sîlehan xemelneno û vano: “Ma ko Qendîlî bi temamî îmha bikerê.” Qaşo karê ay wezîrî ro daran û beran, ro awan miqatebûn o. La ma emînê ke eynî wezîrî veşnayîşê dar û beranê koyanê ma ke TSKî agir eştibi ci bi zewq temaşe kerdo. 

Dima ra yewo bîn, bi pênaseyê Wezîrê Enerjî (Taner Yildiz) vecêno sehnî ser û vano: “Eke ma wazenê ey bêrê serê rayîrê ma gereke ma hîrê rocî elektrîkê înan bivisnê.” (Nêza çimeyê ey elektrîkî ke ma pê tehdît keno çara yeno?) 

Bi rastî wexta merdim anêno vatişanê înan ra mezgê merdimî vindarêno. Tenêke ameyo heta asta wezîrî la hema zî têkoşîna şarê kurdî ra ke çewres serre yo domêna fam nêkerdo. Etya bifikriyê ke şarê kurdî hemverê zihniyetêke senînan têkoşîne keno û xo ver dano. Beno ke şima vacê endeyke zî nêbeno la her ke rocî derbas benê şarê kurdî rast ro şexsanê cîya cîyayan yenê û benê şahidê wendeyê bêmezgan, benê şahidê nîjadperestî û bêtehemulîya ey şexsan a şarê kurdî rê. 

Dimayê nawitişê wezîran, tîmê taybetî Gever de terorê xo serê karkeranê înşeatî de mocnenê ra û wazenê tersê xo bi awayê verê çewres-neway serre bifînê şarê kurdî ser û înan teslîm bigîrê. 

Raşt a, zihniyetê dewlete nêbedelyayo, zihniyetê înan zihniyetê neway serre verî yo, la ey xo vîr ra kenê ke kurdî kurdê neway serre verî nîyê. 

Dimayê ey sehneya ra lazim bi ke wendeyê înan zî wezîr û eskeranê xo ra kêmî nêmanê û tenêke bi pênaseyê profesorî (Ahmet Atîla Şenturk ke peywirkarê edebîyat û ziwanê tirkî yo) vecêno sehnî ser û bewlî yo ke nêwazeno wezîran û eskeranê xo ra pey bimano û mezgê sereyê xo bi vatişê: “Wa hemverê her şehîdêke wekîlêke HDPij bêro warardişî (kiştişî)” mocneno ra.

Helbet şarê kurdî nêwazeno xo bifîno sewîyeyê înan la eke o zî vaco: “Wa hemverê her sivîlanê ma yê ke hetê dewlete ra ameyê kiştişî wekîlêke înan bêro warardişî” ko meclise wekîlanê partîyanê înan ra bibo venge, yew înan ra nêmano. 

La şarê kurdî fikrê newînan teberê merdimahî û zanyarî de vîneno û senîn ke hîri serrî yo aştî de israr keno heta azadîya Rayverê xo, heta aştî bêro serê axa înan û hesrê dayan vindaryê ko waştişê xo yê aştî ra fek verra nêdo û ko semedê azadî, demokrasî û aştî têkoşîna xo bikero. 


Nesrîn NAVDAR