Qetlîamê Mereş û 19ê Kanûne yê girotxaneyan, sûkanê kurdistan û tirkiye de amey protesto kerdin. Nûmayişan de vajiya ke, zihnîyetê qetlîaman ewro, bi destê AKP yeno ramiten.
‘Kiştox dewlet do hesab bido”
Dersim de rîwale protestokerdenê qirkerdenê Mereş û 19ê Kanûne rayşiyîn virajiya. Bi seyan kes ser vengdayenê Meclîsê Şar yê Dersim amey têlewe. Nûmayişkarî bi panqarta “Mereş ra heta 19ê Kanûne ma dê hesabê qetlîaman pers kerê” kuçeyê Sanat ra heta Çarşiyê Yeralti rayşî.
Nûmayiş de sloganê jê “Mereş xo vîra meke, me de vîrkerdiş”, “dewleta kiştox do hesab bido” bî berz. Badê vinderdişê hurmet azaya ÎHD Evrîm Ay qesey kerd û ard ziwan ke, rexmo ke tarix 19ê Kanûne 2015î damûsneno, la girotxaneyan de hona kî tecrîd, îşkence û zorvajî yeno ramiten. Nûmayiş de, verra kurdistan êrişê dewlet û ablûqeya ci rê nêrazîbiyen ame damûsnayen.
Erzêrûm de zî qetlîama 19ê Kanûne û terora dewlet ya nikayî amê protesto kerdin. Nûmayişo ke ver girotxaneyê tîpê H yê Erzêrûm de viraziya de serokê şûbeyê ÎHD yê sûk Medenî Akgul’î qesey kerd û vist vîrî ke, hona hesabê qetlîamê 19ê Kanûne nêame perskerdin. Nûmayiş de hayr anciya dirûmê tepişteyanê nêweş ser.
Qetlîamî ramenê
Jû nûmayişa protestokerdinê polîtîkayanê qetlîam zî Enqera de viraziya. Nûmayişa ke Parqa Tekmezar de viraziya, hetê HDP, Halkevleri, EMEP amê organîzekerdin. Nûmayişkarî bi panqartê “Mereş, Cizîr, Nisêbîn, Sîlopya, Sûr, qetlîamî ramenê. Verra faşîzmî xoverdayiş” heta meydanê Tûzlûçayir rayşî. Nûmayiş de sloganê “kurdistan faşîzmî rê beno mezel”, “kiştox dewlet do hesab bido”, “şarê kurd tenya niyo” berz bî.
Damûstayina piyayî de vajiya ke, qetlîama Mereş ewro bi destê AKP kurdistan de yena ramiten. Şarê bindest bi xoverdayiş û xopawitişî cewab danê qetlîaman.
Şima kiştoxiyê
Enqera de herzewbîn qetlîama 19ê Kanûne, ke 28 tepişteyanê şoreşger weşiya xo kerd vinî zî amê protesto kerdin. Nûmayişa ke Parqa Guven de amê viraşten, xeylê temsîlkarê sazgehanê sivîl tewr bî. Nûmayiş de panqartê “Ma qetlîam û xoverdayişê 19 Kanûne xo vîra nêkerd” abiya.
Nûmayiş de şahidê qetlîam ra Mahmût Konûk’î qesey kerd û vist vîrî ke, ewro zî dewlet seba pakkerdin şî kurdistan. Dirbetinanê qetlîam ra, Velî Saçilik’î zî wina qisey kerd: “A roj qolê mi cikerdî. Bado qolê mi kuçeyan de, fek dê kutukî de ame vînayen. Saçilik’î vi vatena “şima kiştoxî yê, a roj zî, ewro zî şima şaran qetilkenê” hayr ant terora dewlet ya kurdistan ser.
Tarixê bi gonîn
Qetlîama 19ê Kanûne Edena de zî protesto bî. Nûmayişkarê ke waştî Meydanê Beşocak ra heta Parqa Înonu rayşirê hetê qûwetanê dewlet amey manîkerdin û ser nay tengezarî vejiya. Peycoy damûstayîn ame dayen û vajiya ke, tarixê tirkiye bi qetlîam û qirkerdinan dekerde yo.
Stenbol de zî welatijan waşt Meydanê Tunel ra heta Meydanê Galatasaray raşyirê. La polîsan destûr nê da şêligî. Ser nay damûstayin ame dayen. Damûstayin de vajiya ke, 19ê Kanûne, zey ‘ageyrayişê cuwyane’ nê, zey ‘qetlîamê 19ê Kanûne’ kewt tarix. Herzewbîn hayr anciya ‘Planê Tûfan ser. Peyniya damûstayin de ame vaten ke, qetlîaman ra hesab do bîro persayiş.
NAVENDÊ XEBERAN