Çend rojî verê Serekkomar Tayyîp Erdoganî mîtîngêk de derheqê Namzedê Serekkomarîye yê HDPyî Selahattîn Demîrtaşî de vatbi ‘Eke meclîs qerar bigirêwtêne û bierşawitêne mi rê, mi do îdamê Demîrtaşî tesdîq bikerdêne’. Nê vatişî ser o her ke şono reaksîyonî zêde benî.
Babete ser o torinê Seyyîd Rizayî ke 1937 de ame îdamkerdiş, qisey kerdî. Dêrsimijan ra Gulşen Borake va ‘derheqê Demîrtaşo ke îradeya bi mîlyonan o de wina qiseykerdiş, tersê înan nîşan dano’ û wina domnaye: “Tarîx de vatişê winasî zaf î. Ma do sindoqan de cewab bidî Erdoganî.”
Çagdaş Bîngolî wina va. “Erdogan kesêko qatil o û ganî Tirkîya na raştîye bivîno. Zîhnîyeto ke Seyyîd Rizayî îdam kerdî, ewro dewam keno. Ma do vera zulmî de sere nêronenî û heta peynî xover bidî.”
Torinê Seyyîd Rizayan sere nêronenî
Ekber Doganî dîyar kerd ke ê do waştişê Erdoganî qirika ci de biverdî û wina domna: “Demîrtaş do bi hawayo serrîberz zîndan ra bivejîyo, labelê Erdogan do nêşênbo mîyanê şarî de bigêro. Seyyîd Riza ame îdamkerdiş, labelê torinê ey vera îdamkaran de sere nêronenî.”
Ozgur Tutmezî va ‘vatişê Erdoganî seba rayan o’ û wina dewam kerd: “Pey Demîrtaşî de bi mîlyonan kesî estî. Tirkîya de yê ke menfîetê şarî fikirîyenî, heme ameyî îdamkerdiş. Ma do sindoqan de cewab bidî îdamkaran.” Zeynel Abayî zî da zanayîş ke Demîrtaş se kerdo ke ti ey îdam kenî? û wina va: “O bi xo vejîyayo rasteyan, qisey keno labelê nêverdano Demîrtaş qisey bikero.”
MA/DÊRSIM