Şahîya aşûre ke her ser virazîyena, bi sebebê tîvarî emserr amê qedexe kerden. Bi sebebê na qedexe Komeleya Kulturê Pîr Sultan Abdalî emserr şahî baxçeyê cemxane de viraşt. Hemseroka Pêroyî yê DBP Sebahat Tuncel ra pîya Serokwekîlê Koma HDP Îdrîs Baluken, Wekîla HDP yê sûk Nûrsel Aydogan, Hemşaredar û îdarekarê HDP û DBP yê sûk û temsîlgarê dezgehanê civaka sivîl zî tewr bî. Şahî bi geyrnayişê Semah destpa kerd. Semaha ke raştê eleqeyekê gird amê ra dima dûa amey kerden û aşûre amê vilakerden. 

‘Ma dê bibê Pîr Sûltan û Seyît Riza' 

Serokê PSAKDî Cafer Kolumanî vist vîrî ke wazenê îtiqatê înan qedexe bikerê û wazenê ke elewî bi destûra înan îbadet bikerê. Kolumanî aşkere kerd ke heta nika înan seba îbadetî kesî ra destûr nêwaşto, neyra tepya zî nêwazenê û wina dewam kerd: Ma dê Sehpa de bibê Pîr Sûltan, Dersim de zî bibê Seyît Riza. Zilmo ke Kerbela de Şah Huseyînî rê amê kerden, şarî rê amê kerden. Seba ke Kerbelayê newî nîrê kerdiş ganî pêrokîn alewî bibê yew û xo rêxistin bikerê. 

Hemşaredarê Sûka Pîl ê Amedî Firat Anli zî hayr ant hêrişanê dewleta Tirk ser û va: “Ma reyna bi Kerbelayanê newî ra rî bi rî yê. Ma her tim bi vinderdişê Huseyînî rindî het de vindenê. Senî re roja înê tîvarîya cemawerîyê yena giroten, ganî tîvarîya  welatijanê elewî zî bîro giroten. Eke dewlet tîvarîya elewîyan nêgîro, no şerm o.”

No welatî de tîvarîya elewîyan çîna

Hemseroka Pêroyî yê DBP Sebahat Tuncel zî aşkere kerd ke no welatî de tîvarîya elewîyan çîna û va, ‘xo vîra mekerê ke no welatî de elewîyan îtiqatê xo nimite. Mecbûr mendî ke cemxaneyan de îbadetê xo bikerê.’ Tuncel vist vîrî ke dûştê elewîyan nefret vistî ver û wina dewam kerd: “Vatî ke kiştişê elewîyan wacîb o. No bi zihnîyetê yewperestîye ra girêdayî yo. Hêrîşê ke ewro benê, dûştê ma pêrokînan de benê. Rîwalo ke ma elewîyê û kurdîyê ma raştê hêrişan yenê.Heqê ma yê weşîye destê ma ra yeno giroten. Ganî ma pêrokînî dûştê herb de bibê yew û tekoşîn bikerê. Cewherê pêro îtiqatan de haştî esto. O wext ganî ma pêrokîn îtiqatî dûştê zaliman de bibê yew. 

Zilma Yezîdî 1335 serrîyo rameno  

Serokwekîlê Koma HDP Îdris Balukenî zî vist vîrî 1335 serrîyo ke zilmê Yezîdî rameno. Balukenî da zonayen ke dûştê no zilmî de tekoşîn zî yeno dayen û wina va: “Dûştê zîhnîyetê yewperestî têkoşîna pir ziwanî, pir kulturî û pir îtiqatî ramena. Pêvacoya çarekerdişî de ma pêrokînan omidê haştî ciwîya.”

Balûkenî hayr ant hewldayenê Rayverê Şarê Kurd Abdullah Ocalanî yê seba haştî ser û qiseyê xo bi nê vatenan domna: “Pêdîyayişa tewr krîtîk ê Îmrali de Birêz Ocalanî va, ‘eke şima wazenê pêrokîn meseleyan çare bibê ganî no welatî de pêrokîn ziwan, kultur û îtiqatî azad bibê. Ganî pêrokînî bi qanûnan bîrê garantîkerdiş. Eke kurd û elewî qanûnan de nêraviyerê o wext no welatî de azadîya îtiqatan û demokrasî çîna.’ Balûkenî tewr peynî de aşkere kerd ke eke no welatî de televîzyonê elewîyan yeno giroten, keyeyê elewîyan yenê giroten û deqkerden, no   tespîta Îmralî damusneno û va, no yew hetê heqî nîno qebûlkerden. 

Qiseyan ra dima eşûre amê vilakerden.  

 

DÎHA / AMED