‘Zimistan açarnîme wesarî’
Deklerasyonê wertexîn yê HDP, HDK, KCD, DBP û TJA ra dima Meclîsê Cinîyan yê HDP zî bi deklerasyoneke prensîbê xo yê referandûmî aşkere kerd. Meclîsê Cinîyan ke seba ‘Nê’ qerar girewt, do rejîmê mordemekî û yewperestîye rê û sîyaseta merdişî û şerî rê vajo ’Nê’. Meclîsî veng da pêrokîn cinîyan ke bi rihê 8ê Adare, bi coşê Newroze dest bide yewbînî û zimistan açarnê wesarî.
Kombîyayişê deklerasyonî ke Enqere de roja Yewşeme virazîya de bi desan cinî tewr bî. Destpa kerdişê kombîyayişî de mesaja Hemseroka HDP Fîgen Yuksekdag ke tepiştî ya hetê Parlementera Agirî Dîlan Dîrayet ame wendiş. Goreyê deklerasyonî Meclîsê Cinîyan do kampanyaya referandûmî bi slogana “Rejîmê mordemekî û yewperestîye rê NÊ” bido ramitene.
Îxtîdarê AKP sifte hêrişê cinîyan kerd
Deklerasyonî de hayr ancîya têkoşînê cinîyan ser û wina vajîya: “Zey cinîyê HDPyijî; ma bi zonayiş û tecrubeyê xo yê têkoşîna serbestîye bî bingeyê têkoşîn û têduştîya cinîyan.”
Meclîsê Cinîyan yê HDP deklerasyonî de aşkere kerd ke bi quwetê cinîyan ya vurnayişî înan hewl da ke cuya newî înşa bikerê û wina dewam kerd: “Partîyê sîyasî, îdareyê herêmî û pêro sazîyan de ma sîstemê hemserokîye rona û ma waşt îradeyê cinîyan pêrokîn cayan de pratîze bikerê. Ma weçînayîşanê 7ê Hezîranî de îxtîdara AKP peyser eşt, bi 26 parlementerê cinî kewtî meclîsî û ma yewîn koma cinîyê parlementer’ rona. Ma cayê xo cinîyanê Rojawa ke dûştê DAIŞî de têkoşîn ramitî girot. Nayî ra îxtîdarê AKP verikîn hêrişê cinîyan kerd û waşt destkewteyanê cinîyan çinî bikero.”
Deklerasyonî de ame dîyarkerdiş ke qeyûmê ke tayînê şaredarîyan amey kerdiş, armanca înan a yewîne vindernayişê gureyînanê cinîyan o û derheqê babedî de enê detayî amey dayen: “Tenya weadê îktîdarî seba şaran şer (lej) o, la yê ma cinî, ciwyan û ciwîyankerdiş o. Nayî ra ma sîyaseta merdiş û şerî rê vanê NÊ. Ma fina da bîn îlan kenê ke ma dê bi têkoşîna xo ya serbestî û têdûştî haştî bîyarê. Rexmo ke no 14 serrî yo bi îxtîdara ke destê înan de ya bi selahîyetê xo heqanê ma xesp kenê têr nêkenê, wazenê selahîyetê girdêr bigîrê û bidê destê yew mordemekî.”
‘Rejîma mordemekî'
Meclîsê Cinîyan yê HDP vist vîrî ke wazenê bin nameyê vûrnayişê qanûna bingeyî de selahîyetan bidê destê jewî û rejîma nikayî dewamdar bikerê. Deklarasyonî de vajîya ke meclîsê Tirkîye de pêdiyayişê vûrnayişê qanûna bingeyî bi tepiştişê Hemserokanê ma û parlementeranê ma destpa kerd û wina dewam kerd: “Dima ra demê pêdiyayişan de metodê şîdetî ke kar ardî damûsnay ke do îdareyekê senî bîro ronayiş. Her madeya qanûnî de îpotekkerdişê ameyoxa cinîyan, letekerdişê civakî, xorîkerdişê şerî, berzkerdişê feqîrtî û tesfîyekerdişê cuya cinîyan esto. Nameyê na sîstema ke vanê ‘Sîstema Serokomarî’ zî ‘Rejîma mordemekî’ ya.”
Sîstema ‘Cuya Newî’ tehdîd kenî
Peynîyê deklerasyonî de ame dîyarkerden ke cinîyan dûştê zextan de sereyê xo nimiz nêkerd û bi nê vatenan qedîya: “Ma zanê ke bi komkerdişê selahîyetê rayverî, dadgeh û qanûndayişî destê mordemekî wazenê sîstema ‘Cuya Newî’ tehdîd bikerê û bi sîyaseta camêrdîye ya cinsîyetperest cinîyan teberê her çî de biternê. Ma dê nayî rê destûr nêdê. Cinî; bi doman, reng û cîyayîye xo garantîyê cuyî ye. Têkoşîna cinîyan ya serbestî û têdûştî têkoşîna ‘Cuya Newî’ ya. Ma dê kuçe bi kuçe, keye bi keye bigeyrê û vengdayişê NÊ bikerê. Ma veng danê pêrokîn cinîyan ke bi rihê xoverdayişê 8ê Adare, bi coşê Newroze her ca de, bi pêro ziwan hu rengan dest bidê yewbînî û hewtrengê asmenî ke ma pîya zimistanî açarnê wesarî.”
Heto bîn ra HDK zî Stenbol de deklerasyonê referandûmî aşkere kerd. Hemverfeka HDK Gulîstan Kiliç Koçyîgît ke deklerasyonî aşkere kerd da zonayene ke seba herkesî îyê dê vajê NÊ.
ŞÛJIN/ENQERA
