Hepsîyo bi nameyê Serhat Yildirimî bi mabênkarîya pîyê xo Hamdûllah Yildirimî qala zextê ke Zîndanê Gurgumî de benî kerde û da zanayene ke Zîndanê Turkoglu yê Gurgumî de çîyê ke 12ê Êlule de bîyêne înan ser o yenî ferzkerdene. Goreyê melumatê Yildirimî zîndan de hepsîyan ser o wendişê marşî û payan ser o hûmare dayene yenî ferzkerdene û derb, îşkence û pêvînayîşî yenî astengkerdene.
Zîndananê Kurdîstan û Tirkîya de her roje xeberê zext, îşkence û sewbîna neheqîyan yenî. Bitaybetî çend zîndanî estî ke sey zîndanê pîlotî yî û xeylê çîyî ewja ra dest pêkenî û vilayê zîndananê bînan benî. Nê zîndanan ra yewe zî Zîndanê Turkoglu yê Gurgumî yo.
Bi nameyê Serhat Yildirimî de hepsîyêk 2 aşmî verê Zîndanê Tarsûsî ra surgunê Zîndanê Turkoglu yê Gurgumî ame kerdene. Yildirim bi mabênkarîya pîyê xo Hamdûllah Yildirimî qala neheqîyê ke Zîndanê Turkoglu yê Gurgumî de benî kerdî. Pîyê ci Hamdûllah Yildirim 16ê Êlule de şîyo pêvînayîşê xo lajê xo û vatişanê lajê xo neql kerd.
Yildirimî da zanayene ke o şîyo pêvînayîşo padaye û wina dewam kerd: “Goreyê vatişê lajê mi koguş û korîdoranê zîndanî de gardîyanî danî hepsîyan ro. Reyna gardîyanî hepsîyan ser o wendişê merşî û payan ser o hûmare dayene ferz kenî. Hertim gardîyanê cîya-cîyayî polîtîkayanê cîya-cîyayan hepsîyan ser o danî ferz kerdene. Grûbêka gardîyanan reyêk baş nizdî bibo, grûbêka bîne şîddet bikar ano. Bi no hewa hêrişê psîkolojîkî zî yenî kerdene.”
Keyeyî zî raştê heqaretan yenî
Pî Yildirimî va ‘vera keyeyanê hepsîyan de zî muameleyê dişmenî yeno kerdene’ û wina dewam kerd: “Heta ke keyeyî şonî salona pêvînayîşî 2-3 reyî yenî sehnayene û raştê heqaretan yenî. Mi 12ê Êlule dî labelê zulmo ke Gurgum de yeno kerdene sewbîna hewa yo. Hepsîyan ma ra nêva, labelê 2 pêvînayîşê akerdeyî yê peyênan de hepsîyî ameyî derbkerdene. Çimkî vengê înan salone ra ameyêne. Gardîyanê hêrişê keyeyan zî kenî û eke keyeyî vera gardîyanan de bivinderî, o wext pêvînayîşî yenî betalkerdene.”
Wa partî û rêxistinî tayê çîyan bikerî
Pî Yildirimî va ‘badê ke grevê vêşanîye ke seba Rayberê Şarê Kurdî Abdullah Ocalanî ameybî destpêkerdene 22ê Gulane de peynî bîyî hepsîyî nînî tedawîkerdene’ û wina qedêna: “Lajê mi û embazê ci nêameyî tedawîkerdene. Nika zî nînî muayenkerdene û heqê înan yê esasîyî yenî xespkerdene. Ez veng dana heme partîyanê sîyasîyan û rêxistinanê sîvîlan ke wa no het de hesas têbigêrî û tayê çîyan bikerî.”
MA / MÊRDÎN