Sêr zîyaretê Mesut Barzanî yê Amedê yew karîkatur vila bi.

No karîkatur de, Îbo zirnecî,Şivan tembûrvan bi. Ver Şivanê de Mesut Barzanî, ver Îbo de R.T.Erdogan, beyntarê înan de  alê Tirk bibi. Sêr alê Tirk de zî, yew kevok yanî borane bibî û reqs kerdê.
No karîkatur, karîkaturek zaf bi manê bi.
No karîkatur raştiya sextekariya dewlata Tirk, AKP, R.T.Erdogan û zîyaretê Mesut Barzanî yê Amedê nîşandenê.
Hetê bîn ra qeşmeriyê Îbo û Şivan zî nîşandenê.
Werti de aşîtî û maşîtî çîno. Werti de borane aşîtî zî çîna. Borane aşîtî ra heqeret esto.
Zobî yew resmê yewbîdîyayîşê R.T.Erdogan û Mesut Barzanî zî bibi.
No resmê de Erdogan serê mase de ronişto. Yew kiştê Erdoganê de Wezîrê Erdogan û şîwermendî eyê estî.
Kiştê Erdoganê a bîn de Mesut Barzanî û yardimkarê eyê estî.
Ma zanî pêro yewbîdiyayîşanê temsîlkarê şaran de pêronê hetan ver yewbînan ronişenê.
Prensîbê şeklê roniştişê yewbîdîyayîşan hinaw o.
La Erdogan, Mesut Barzanî zê yew wezîrê xo vîneno, seba nayê zî kiştê xo de ca dawo Barzanî.
Erdogan pê nayê dana nîşandayîş ke, Başurê Kurdîstanê zî zê erdê xo yanî zê erdê Tirk vîneno.
Reyna, pê paştê Erdoganê de zî tenê alê Tirkan bibi. Alê Başurê Kurdîstan çinî bi.
Yew resmê bîn zî bibi.
Wexto kê Mesut Barzanî şi zîyaretê Şarêdarîyê Amed, no resmê vejîya werti.
Mesut Barzanî û Osman Baydemîr ver yewbînan vindê û hina qisê kerdî.
Wexto ke, danazanayîş zî da, pê paştê Mesut Barzanî û Osman Baydemîr de alê Başurê Kurdîstan bibî.
Ez nayên vana, wa şewîrîyê nayê zî Şarê Kurd bikero.