Ziwan kamîye virazeno

15’ê Gulane serrgera mîrasa ma, roja serrgera Roşanê Ziwanê Kurdî bi. Çi heyf ke emserr zî şarê ma, roja ziwanê kurdî, roja roşanê kurdî, zerrşikite vîyarna. Çimkî Vakurê Kurdistan de hafizaya kurd, halîn û mîhraga kurd-kurdî azade nîya. Adirê herbo bê edalet hona nêşino. 

Kurdan emserr zî roşanî kurdî zerrî ra nîvîyarna ra, nêcuya. Sedemo ke statûya kurdî çîn o. Ziwanê kurdî fermî nîyo. Ziwanê kurdî, ziwanê perwerde û tam ê pewendî nîyo. Kurdî, ziwanê girotiş-rotiş yê bazarî nîyo û ser o de kulturê kurd tirktî peradîyayo, kuçê û papola kurd, war û wargehî kurd tirkî namê bîyo. Heyf ke cil û bergî kurd, werdê kurd, eşq û hesletî kurd zî, bi tirkî yo. 

Seserrano qedexe yo

Kurd tirkî waneno, nuseno û fikrîyeno. Kurdistan de kurdî seserrano qedexe yo. Bê kurdî, dinya de jew ziwan qedexe nêbîyo. Ona yew felaketo bê emsal de, gelo kurd senî roja ziwanê kurdî firaze bikero..? Ziwan, tena hacetî qisekerdiş nîyo, ziwanê hacetî goşdarîkerdiş û famkerdişî yo zî. Ziwan kamîye virazeno, kulturê kurd neqlê neslo newe keno. Aye ra, wexto ke dayikê kurd ziwanê kurdî, ewladê (doman/qij/qeçek/tûtî) xo rê danê musnayiş, tenya kurdî nêdanê musnayiş, domanî kena wayerê kamîyê kurdî. Dayikê kurd wexto ke ziwanê da û bapîran danê tutî xo, qebîlîyetê ci zî danê tutê xo, tutî kenê kesê zanayî. La, tûtî/domanî her daîm înisîyatîfê dayike de nîyê, domanî esas dibistanen (mekteb) de perwerde benê. 

Her çî goreyê vîn, vîr û ziwanê tirkî yo

Rolê musnayişî dibistanan de bedelîyeno, na rey mamosteyê dibistanî rolê dayike genê. Sedemo (serva) ke Vakurê Kurdistan de ziwanê fermî tirkî yo, sedemo ke encex yew tut pê tirkî reseno mebesta xo. Sedemo ke veng tirkî yo, stîl tirkî yo, muhakema tirkî ya, kamîye zî tirk a. Çimkî, domanê kurd wendiş û nuştiş pê (bi) vengê tirkî musenê, cok ra her daîm fikrê xo bi tirkî vanê, zanayişê xo tirkî pratîze kenê. Sedemo ke metnan de tarîx tarîxê tirkan o. Kultur, kulturî tirkan o. Her nuşte, her metn goreyê vîn û vîra tirk pê ziwanê tirkî hedre bîyê. Ayera tutî kurd, nêşkenê xo kurdî îfade bikerê. Ayera, 15’ê Gulane roja Roşanê Kurdî ma rê bîyo roja hawara kurdî. 

Her kes şeno vajo hawar!

Kurd ziwanê xo nêcuyenê. Kurdî roj bi roj vînî bena. Welatijê kurd azad nîyo. Kurd, ona rewşa awerte de senî bi coş roşan fîraz bikero..? Mîrê ziwanê kurdî, Celadet Bedîrxan 15’ê Gulane 1932, pelo verên ‘Kowara Hawarî’ de ona nuseno. (... Wa kes mevajo, ez kesekê rebena, kerî nê kare ziwanî nêna… Her kes şikenê, bi qeydeyêk vajo hawar! Hawarê kurdî…). Eke ewro her kurd têfek ra, têder nêvajê, ey! Hawar! ziwanê ma vînî beno, heger her kurd nêvajo ‘berên ma her qade komelî de bi riheko seferberî, ma ziwanê xo qise bikêre, biwanê û binuse’ se ziwano qedîm kurdî vînî beno. Malesef no mîraso xozayî û no mîrasî nirxî merdimahî vînî beno. Roşan o yo, gera her kurd bi riheko seferberî, her qada komelî de kurdî qise bikero. Kurdî bi fikir ro. Kurdî biwano û ziwaê kurdî lezgîn azade bikero.