Herême de roje çin a ke qedexeyê tebervejîyayîşê kuçeyan û qedexekerdişê dewan nêro îlankerdiş. Tewr peynî 102 dewanê Amedî de qedexeyê tebervejîyayîşî ameybî îlankerdiş. Dewa Roboskê ke 28ê kanûna 2011 de netîceyê bombevarnayîşê teyarayanê dewleta tirk de 34 kesî merdbî zî para xo nê qedexekerdişan ra girewte.
Dewijan mîyan de yê ke tewr zaf qedexeyan ver mexdur benî zî berîvanê ke zozanê înan ameyî qedexekerdiş î. 25 berîvanê ke her serê sibayî şonî mezraya Zevîya û ewja de karê xo kenî, qisey kerdî. Kadîre Encuya ke 30 serrî yo berîvanî kena, va ‘her roje bi qedexeyan cuya înan tayîna yena tengkerdiş’ û wina dewam kerde: “Seba ke warê nizdîyê zozanan ameyî mayînkerdiş, ma nizdîyê dewa xo de heywanan doşenî. Ma zaf zehmetî ancenî. Verê wina nêbî; ma şînayêne lazimîyê xo bigirî. Nika destê ma de tena no kar mendo. Ma debara xo bi şite, penîr û mastî kenî. Warê ma yê cuyayîşî mayînkerde yî.”
Ma nêşênî bicuyî
Halîme Encuye zî va ‘zaliman qet huzir nêverda’ û wina dewam kerde: “Ma cografyayêka rindêke de cuyenî labelê ma nêşênî tede bicuyî. Verê cû hûmara heywananê ma hîna zêde bîye. Ma bi wesayîtanê kîrakerdeyan yenî tîya. Seba ke zozanê ma yê Binexşî qedexe yî, ma tîya de yî. Ma nêşênî erdê xo yo rindêk ser de bicuyî.”
DÎHABER/ŞIRNEX